ПРЕСВРТ | Година под лупа: Што испорача власта, што остана на хартија и каде се потфрли?
Во новата и последна епизода за овој циклус на емисијата „Пресврт“, гостува пратеникот од редовите на ВМРО-ДПМНЕ, Љупчо Пренџов. Во студиото на „Слободен печат“, со Пренџов разговаравме за првата година од мандатот на владата – што е реализирано, каде се направија клучни грешки и кои се приоритетите што остануваат до крајот на четиригодишниот циклус.
Препорачано
Го отворивме и прашањето за политичката стабилност – по распадот на Алијансата за Албанците и преминувањето на пратеници во опозиција, дали власта ќе успее да обезбеди бадентерово мнозинство за клучните закони?
Во фокус се и претстојните локални избори, амбициозната најава на Христијан Мицкоски дека СДСМ нема да освои ниту една општина, како и процесот на внатрепартиска селекција на кандидати. Кои се имињата за градоначалници со кои власта ќе бара доверба од граѓаните на претстојните локални избори.
Се осврнавме и на темата за застојот во Скопје, анкетите за рејтингот на ВМРО-ДПМНЕ, економските предизвици и барањата од НАТО за повисоки одбранбени трошоци – сето тоа низ објектив на партија што сега ја носи одговорноста за државата.
– Владината коалиција е повеќе од стабилна. Таа брои речиси две третини во Собранието на Република Македонија, што одамна не било случај. Тоа е фактичката состојба. Кога имаме закон, го носиме – изјави пратеникот од ВМРО-ДПМНЕ, Љупчо Пренџов, за „Слободен печат“.
Говорејќи за тековната состојба со Изборниот законик, Пренџов посочи дека околу ова прашање традиционално постои поширока политичка согласност и дека очекува поддршка и од опозициските партии.
– Обично, кога станува збор за Изборниот законик, постои разбирање меѓу сите политички чинители – и СДСМ, и ДУИ, и ние како владејачко мнозинство. Доколку понудиме квалитетно законско решение што е во интерес на граѓаните, тогаш е тешко некој да го одбие – без разлика дали се работи за Таравари, Ахмети или Филипче. Денес, сè е јавно и транспарентно – имаме портали, подкасти, Собраниски канал – и таквите одлуки се под лупа на јавноста – рече Пренџов.
Тој додаде дека, според неговите информации, поддршката за новиот изборен законик, кој се подготвува во рамки на Министерството за правда, е речиси сигурна.
– Очекувам поддршка од сите пратеници. Законикот е во завршна фаза и верувам дека ќе биде изгласан со широка политичка согласност – истакна Пренџов.
Целиот разговор со пратеникот од ВМРО-ДПМНЕ Љупчо Пренџов, можете да го погледнете вечер во 19.00 часот на каналот на Јутјуб и порталот на „Слободен печат“ во емисијата „Пресврт“ со Дејан Србиновски.
