Европскиот суд за човекови права (ЕСЧП) пресуди дека Хрватска го прекршила правото на слобода на изразување на жена која беше осудена за тешка клевета откако ги нарекла своите соседи „корумпирани криминалци и крадци кои го поткупиле градоначалникот на општината и инспекторите“ во присуство на тројца геодети, пренесе „Јутарњи лист“.

Судот во Стразбур заклучи дека хрватските судови „не успеале да постигнат фер рамнотежа помеѓу правото на слобода на изразување на подносителот на барањето и правото на заштита на честа и угледот на нејзините соседи“ и ѝ додели на жената 2.600 евра нематеријална штета и 890 евра за трошоци.

Тужителката претходно била осудена за тешка клевета во кривична постапка пред хрватски суд, откако пред тројца геодети во канцеларијата за геодетски работи рекла дека нејзините соседи се „криминалци и крадци“, дека се „корумпирани“ и дека „го поткупиле“ покојниот градоначалник на општина Стубицке Топлице и сите општински инспектори“.