Пратениците на Комисијата за финансирање и буџет денеска продолжуваат да дискутираат за извештајот на Државниот завод за ревизија за Клиниката за радиотерапија и онкологија. Пратеникот Љупчо Пренџов рече дека целата пратеничка група на ДУИ и дел од пратениците на СДСМ гласале против тоа овој извештај да се дискутира на претходна пленарна седница, ги прекори за тоа и почна да им ги чита имињата.

-Целата пратеничка група на ДУИ гласаше против тоа овој извештај да се најде на пленарна седница, исто како и дел од пратениците на СДСМ, а вака јавно, од говорница „сите сте заинтересирани дали таму се крадело“. Тоа е хипокризија на Собранието и причина што Собранискиот канал е малку гледан. Вас ви е мила вистината за Онкологија, ама помили ви се другарите во СДСМ и ДУИ. Па после ќе ми глумите загрижени, а Никола Васев ви држи предавања на партиски митинзи и го објавувате на Фејсбук, а имате и друг талент, како Нехат Нухи од ДУИ, рече пратеникот Пренџов.

Пратеничката Жаклина Пешевска го квалификуваше случајот како „скандал над скандалите“.

-Преку овој случај е доведено во прашање највисокото загарантирано право на здравствена заштита. Не може ниедно раководство на Министерството за здравство да нема одговорност за ова. Во јавноста излегоа легитимни прашања, како на пример, прашањето на професорот Драган Даниловски, зошто смртноста од рак од 2019 година наваму расте, исто како и бројот на заболени, а од тогаш е биолошката терапија? Во јавноста излегува дека не им се препишувале лекови на пациентите, има судски спорови и на крај се наметнува прашањето дали кабелот ќе биде крив или сестрата која ја дозирала терапијата, праша пратеничката Пешевска.

Таа посочи оти е спорно, што КАТО системот, односно системот за компјутерска подготовка на цитостатици не е во функција на Клиниката за онкологија иако е набавен што не е случај со ниедна друга болница во Европа која го има овој систем.

Пратеничката Пешевска го актуелизираше прашањето што националниот систем со кој требало да управува Министерството за здравство, а кој требало да контролира целиот пат на третирање и дијагностика на пациентите, не бил воспоставен.

-Дали ревизоре, само на Онкологија има затворен систем, каде опремата функционира само со реагенси од ист производител, или така е и на други клиники? Друго, Онкологија немала согласност од Фондот за здравство за набавка на биолошката терапија, рече пратеничката додавајќи дека цело време се апелира на редовни прегледи, ама нема термини за мамографија, нема специјалисти да ги прочитаат извештаите од спроведените прегледи, нема мамографи, а пациентките приватно од сопствениот џеб плаќаат 100 евра за преглед.

-Во правна држава за случај како Онкологија плаќа владата, за ваков геноцид, рече Пешевска.

Главниот државен ревизор Максим Ацевски рече дека основното мото на Државниот завод за ревизија е да се спречат последиците и да се посочат ризиците. Ревизорот говореше дека на повеќе институции меѓу кои и на Фондот за здравство, му било укажувано дека ИТ системите им се небезбедни, но тоа било игнорирано, па се случи хакерскиот „рансомвер“ напад. Ревизорот укажа дека Фондот за здравство нема анализа за тоа колку се успешни лекувањата во странство.

-Имаме опрема која е набавена и не се употребува и во други здравствени институции, рече ревизорот.

Ацевски и посочи, оти дадени се препораки Министерството за здравство да направи попис каква опрема има во болниците ширум државата, колкав дел од неа не се употребува и да се елаборира зошто не се употребува и да се стави во функција.

Ревизорот ѝ препорачува на владата, со оглед на тоа што има констатирано набавка на реагенси и апарати во затворен систем (апаратите да може да функционираат само со реагенси од истиот производител од кој е апаратот), да се изменат законите и да се стави крај на монополската состојба од која заложници се болниците и пациентите. Ревизорот Ацевски укажа и дека владата не смее повеќе да носи програми за здравствена заштита, за која нема пари во буџетот, па цел товар паѓа на јавните здравствени установи. Ревизорот укажа дека проблемот не е сегашен, туку барем од пред 15 години.

Пратеникот Панчо Минов рече дека Парламентот, Владата и Фондот, имаат обврска да го изменат законот за здравствена заштита и законот за јавни набавки за да се одземе можноста една фирма да биде на монополска позиција, што се нема случено.

-Сметам дека одговорноста за тоа што се набавувала терапија од еден добавувач, тоа што на монополска позиција е набавувач на опрема и лекови и се набавува на реверс, биолошка терапија над одобрените средства, има име и презиме кој тоа го преавел и тоа треба да се испита од надлежните органи и да се докаже и за тоа да има одговорност. Неколку пати ви кажува ревизорот дека состојбата не е од сега, туку од порано, рече пратеникот Минов.