Премиерот на Гренланд, Јенс-Фредерик Нилсен, денес пред членовите на Европскиот парламент изјави дека сака да ја продлабочи соработката со Европската Унија, во светлината на заканата на претседателот на Соединетите Американски Држави, Доналд Трамп, за можна анексија на тој остров.

Зборувајќи пред европратениците во Стразбур, Нилсен стана првиот лидер на Гренланд кој се обрати пред европратениците, што го означи како крај на она што го нарече „драматична година за Гренланд“, објави  Политико.

„Светот се менува, и тоа брзо. На Гренланд му е потребна Европската Унија, а на Европската Унија ѝ е потребен и Гренланд“, рече Нилсен.

Нарекувајќи ја ЕУ „сигурен пријател во овие предизвикувачки времиња“, Нилсен особено ја нагласи важноста на наоѓалиштата на ретки земји и критични минерали во Гренланд, кои ги нарече ресурси што би можеле да „ги променат глобалните и безбедносните рамнотежи“ и претставуваат одлична можност за инвестирање.

„Гренланд е подготвен да го забрза овој процес заедно со ЕУ“, рече Нилсен, додавајќи дека островот бара инвестиции од Европската инвестициска банка во проекти поврзани со инфраструктура и суровини.

Во својот говор пред парламентарците, премиерот на Гренланд истакна едно отворено прашање, односно забраната за увоз на производи од фоки во ЕУ, за која рече дека силно ја погодила гренландската индустрија за лов на фоки.

На прес-конференцијата, Нилсен рече дека Гренланд е отворен за понатамошна соработка со Соединетите Американски Држави, додавајќи дека таа мора да биде взаемна и да го почитува меѓународното право.

Во исто време, Нилсен им рече на новинарите дека Гренланд не планира целосно да се врати во ЕУ. Островот ја напушти тогашната Европска заедница, претходник на денешната ЕУ, во 1985 година по одржаниот референдум.

Иако жителите на Гренланд имаат дански, а со тоа и европски, пасоши, територијата сè уште формално останува надвор од Унијата.

Дипломатските односи меѓу Гренланд и ЕУ дополнително се интензивираа по агресивните изјави на Трамп на почетокот на годината, кога тој не ја исклучи можноста за испраќање трупи или употреба на економска сила за преземање на островот.