Во текот на јули, Македонија доби значајна помош преку Механизмот на ЕУ за цивилна заштита за справување со шумските пожари.

По активирањето на Механизмот од страна на Владата, два авиона-канадери од Грција беа веднаш распоредени за гаснење на пожарите на југот од земјата.

Подоцна пристигна и хеликоптер од Чешка, како и словенечки противпожарен тим со 62 пожарникари и 18 специјализирани возила за помош при гаснењето на големиот пожар во Источна Македонија. Дополнителна помош понудија и Австрија и Франција.

Механизмот на ЕУ покрива голем дел од трошоците за ваквата интервенција, додека земјите кои ја нудат помошта ги сносат останатите трошоци, како дел од европската солидарност. Македонија ги обезбедува трошоците за храна, сместување и гориво на странските тимови.

Ова не е првпат Македонија да ја користи поддршката од Механизмот – во минатото преку него доби помош при пожари, поплави, како и за време на пандемијата со ковид-19.