На крајот на март и во првите денови на април социјалните мрежи „гореа“ од потрагата по фискални сметки за да се надополни максимумот од 2.100 денари што на име поврат на ДДВ може да го има секој граѓанин што на својот паметен телефон ја има апликацијата „Мој ДДВ“, или, пак, ги скенира сметките на апаратите поставени од Управата за јавни приходи. Постојано се редат објави во кои граѓани прашуваат и бараат да им се прати во порака фискална сметка од оние што имаат вишок. Но, има и такви што ги сликаат сметките и повикуваат некој да се јави. Вакви објави може да се видат по разни групи, но дури има и направена специјална фејсбук-група „Фискални сметки“. Народот се снаоѓа кој како знае за да го пополни домашниот буџет, а на крајот од секое тримесечје или на почетокот на наредното, потрагата по фискални сметки особено се актуализира.

Деновиве сè уште е актуелна потрагата по сметки од март, затоа што рокот за скенирање е 10 дена, па сè уште има можност да се надополни износот од „Мој ДДВ“ за првото тримесечје од годинава. Коментарите се многубројни: некому му фалат 300 денари за да ја исполни квотата за првото тримесечје; една фејсбук-корисничка вели дека има само 660 денари, па ги замолува другите да ѝ пратат сметки да стигне барем до 1.000 денари; а една нуди сметка од 8.000 денари која предизвика десетици коментари, главно од оние што ја советуваа да не ја дава сметката на секого, туку на некое посиромашно семејство на кое му требаат пари.

Фискалните сметки добиени во порака се скенираат исто како да се скенира во живо.

Повратот на ДДВ од македонски добра и услуги изнесува 20 проценти од платениот данок, а од странски е 10 проценти.

– Преку проектот „Мој ДДВ“ како еден од најуспешните, за нешто повеќе четири години на сметките на граѓаните се слеале повеќе од 130 милиони евра. Тоа се сериозни пари што се директно исплатени на сметките на граѓаните и позитивно влијае врз семејните буџети кај повеќе од 540.000 корисници на оваа мерка. Освен дополнителниот приход за корисниците, оваа мерка има и позитивен ефект во намалувањето на сивата економија. Од јануари 2023 година се зголеми прагот на враќање на дел од ДДВ-то изразено во фискалните сметки, од 1.800 денари за едно тримесечје, на 2.100 денари, односно 8.400 денари годишно по корисник – изјавија на крајот од февруари од УЈП.

Дел од граѓаните и понатаму остануваат изолирани од системот „Мој ДДВ“ и ја губат законската можност, тоа да го направат, но од УЈП велат дека можноста постои за секој независно дали има или нема паметен телефон.

– За регистрација на е-ПДД, пензионерите и социјално ранливите категории ќе можат веднаш да се регистрираат во системот на е-ПДД, во која било организациска единица на УЈП, само врз основа на важечки документ за идентификација (лична карта, пасош), без претходна електронска регистрација. За скенирање на фискалните сметки, овие граѓани во секоја организациска единица на УЈП, со помош на службениците на УЈП, ќе можат да ги скенираат фискалните сметки на уредите на УЈП (киоск апарати, скенери и смартфони) – велат од УЈП.

Системот нема да прифати сметки над 30.000 денари, а за тоа корисникот на апликацијата ќе добие автоматска порака од самата апликација.
Граѓаните немаат обврска да ги чуваат фискалните сметки додека се оствари повратот од ДДВ. Доволно е да ги скенираат преку апликацијата „Мој ДДВ“, но не подоцна од 10 дена од издавањето на фискалната сметка. Најнискиот износ за враќање на данокот за едно календарско тримесечје изнесува 50 денари. Доколку износот е понизок се пренесува за исплата за наредното календарско тримесечје.