Потрагата по исчезнатото 16-годишно дете во реката Вардар е привремено прекината поради ноќта и лошите услови, информираа надлежните.

Девојчето денеска исчезна во водите на реката кај селото Уланци близу Градско, по што започна голема потрага со полициски чамци, спасувачи и кучиња-трагачи.

„Дежурниот оперативен центар на ЦУК е известен дека екипите кои вршеа претрага ќе се повлечат поради немање минимум соодветни услови за претрага во ноќни услови. Утре рано наутро, екипите во взаемна меѓусебна координација ќе продолжат со потрагата“, информираа од Центарот за управување со кризи.

Инцидентот бил пријавен попладнево во СВР Велес – две девојки, едно на возраст од 16, а другото од 26 години, потонале во водите на Вардар кај селото Уланци, општина Градско.

По пристигнување на местото, 26-годишната девојка е пронајдена жива, а по 16-годишното девојче сè уште се трага, соопштија од СВР Велес.

Тинејџерка исчезна во водите на Вардар кај Градско, со неа во реката влегла и 26-годишна девојка