Пратениците од владејачкото мнозинство и од опозицијата многу споро напредуваат кон заеднички заклучоци за тоа дали има политичка одговорност за скандалот Онкологија. Анкетната комисија станува арена за политички препукувања и комплетни несогласувања.

-Во времето кога министер за здравство бил доктор Венко Филипче, на Клиниката за онкологија не недостасувале лекови, ниеден пациент не се пожалил на недостиг. До 2017 година немало условен надоместок за лекови на Онкологија. Од 2017 година до денес расте условниот надоместок за клиниката поради зголемувањето на потребите на пациентите за биолошка терапија. Додека Филипче е министер, немало недостаток на лекови, а дека имало зголемена потреба од лекови е факт. Затоа клиниката барала и добила повеќе пари од Фондот. Пациентка на Анкетната комисија тврдеше дека 3 месеци по оставката на Филипче почнал недостигот на биолошка терапија. Јасно е дека зголемената потреба за набавка на лекови била причина што клиниките барале зголемување на буџетите, но клиниките не се дувло на криминалот, изјави пратеникот Ненад Коциќ од СДСМ.

На ова пратеничката Рашела Мизрахи му реплицираше дека во Управниот суд има правосилни судски пресуди, од кои станува евидентно дека дел од граѓаните не добивале терапија на Онкологија, туку морале да си ја плаќаат приватно, по цена и од 113 илјади денари.

-Рековте дека во периодот на Филипче не недостасувала терапија, ама сведокот Дарјан Петров кажа во собранието дека иако терапијата ја имало на клиниката, ако експертот од Франција не ургирал во болницата, тогаш немало ни да ја добие мајка му. Имаме тука барем 3 правосилни судски пресуди во кои судот констатира дека и покрај тоа што лекот бил набавен, на пациентот не му бил даден, ќе ви направиме копии, рече Мизрахи.

Пратеникот Љупчо Пренџов истакна дека некои негови колеги пратеници „сакаат да заштитат и одбранат некого“.

-Има три судски пресуди во кои се вели дека иако имало терапија на Онкологија, не им била давана на пациентите и тоа е многу сериозно во контекст на вистината а не за ситно политички поени. Затоа тие релевантни судски пресуди треба да ве интересираат сите, додаде Пренџов.

Коциќ на тоа им реплицираше дека сакаат да ја минираат истрагата на Обвинителството.

-Вие сакате да ја рушите истрагата на ОЈО и да ја затскриете вистината, рече Коциќ.