Јавноста не слушна одговори за трагедијата во Кочани во која загинаа 59 млади, тема што беше во фокусот на опозицијата на собраниската седница за опозициски пратенички прашања. Вообичаените меѓусебни политички обвинувања овојпат беа меѓу опозициските пратеници и премиерот Христијан Мицкоски и министерот за внатрешни работи Панче Тошковски. На седницата беа најавени и кривични пријави од пратеникот Димитар Апасиев до Мицкоски за одавање службена тајна и попречување на истрагата, но и кривична од премиерот до пратеникот и лидер на Левица за “купен објект по драстично пониска цена“.
Опозициските пратеници од СДСМ и ДУИ, пак, побараа Тошковски да поднесе оставка поради пропустите поврзани со трагедијата во Кочани. Не изостанаа ни квалификации дека премиерот, наместо да одговора на прашањата, ја дефокусира јавноста со други теми. Или, како што рече Апасиев, „Мицкоски страда од синдром на дива коза или вербална дијареа и остава дамки насекаде“.
Во жолчната расправа меѓу Апасиев и Мицкоски можеше да се слушне дека пратеникот ќе го ословува премиерот со „Мицика“ зашто тој него го нарекувал Димче, а така „може да го вика само мајка му“.

Апасиев: Мицкоски едновремено и обвинител, и судија, и бранител

– Почитуван северномакедонски премиер, по невидената трагедија од европски размери за која изразувам најдлабоко сочувство и, како што велат, „на душман да не даде Господ“, сигурен сум дека и ние, глодачите и вие, мачињата, плачевме таа ноќ. Фактите, министре, нема да ви се допаднат, зашто и „Миле ми текна“ си поднесе оставка по бродската несреќа, но вие не. Но, ќе бидете предмет на интерпелација – рече Апасиев.

Тој го критикуваше премиерот зошто не го известил Собранието, а требало – дека Владата донела одлука за кризна состојба и дека на прес-конференцијата по несреќата ја компромитирал истрагата, ја повредил презумпцијата на невиност и едновремено бил обвинител и судија и бранител на градоначалникот на Кочани Љупчо Папазов, со што ги повредил сите дејствија во предистрагата кои се сметаат за тајна.

– Вие направивте кривично дело одавање на службена тајна и попречување на истрагата. Алудирам, на 18 февруари почнавте со постапка за разрешување на јавниот обвинител и кога се случи истрагата – велите: не, сега нема да го разрешуваме. Дали направивте алаш-вериш со Коцевски, односно „нема да го чепкаш Влатко Стојковски (актуелен директор на Државниот пазарен инспекторат, н.з.), а јас нема да ти го чепкам мандатот. Сите ваши пајташи и рекетари оделе во таа дискотека. Изрична надлежност е на ДПИ. И сега, директорот пред него е во притвор, и претходниот, само вашиот не е во притвор. Ова има опасност да доведе до несоодветни обвиненија. До кога ќе ги штитите вашите корумпирани вмровски кадри – праша Апасиев.

Мицкоски: Левица купила имот по двојно помала цена

Мицкоски одговори дека не го разбрал прашањето зашто било конфузно, имало „салва на плукање, навреди и омаловажување, но дека тоа е континуитет на политиката на Димче Апасиев“. Наместо одговор, премиерот од говорница покажа документ дека Левица купила деловен имот во Центар со двојно помала вредност од пресметаната од Град Скопје, и повика Обвинителството и надлежните органи да истражат дали партијата и Апасиев сториле кривично дело.

– Ја користам оваа прилика да се обратам до органите и до министерот за внатрешни работи и до Финансиската полиција и сите други да проверат – дали има основа за кривично дело, дали политичката партија Левица, потпишувајќи го овој договор за купопродажба, сторила кривично дело, така што го купила тој простор по цена од 721 евро за метар квадратен, простор кој вреди најмалку трипати повеќе од тоа што Левица го купила. Од друга страна, Град Скопје вели дека повеќе вреди, а потписник на договорот е Апасиев, професор на правниот факултет при Универзитет во Штип – рече Мицкоки.

Апасиев одговори дека Мицкоски изнел брутални лаги за Левица.

– Почитуван северномакедонски премиер Мицика, вие ме викате Димче, а така може само мајка ми да ме вика. Ова што вие го правите, кога рипате од тема на тема само за да не кажете што сте направиле, стручно во реториката се вика „синдром на коза” или уште постручно „вербална дијареа”. Зборувате за сѐ, само за она што ве прашав не зборувате. Вашите часовници вредат повеќе од таа зграда. Грешно ве брифирале, Левица купи подрумски простории со приземје, а не цела зграда. Вака ми се закануваше и Заев. Еве, ве охрабрувам, да сум имал страв од вакви како вас, немало да се занимавам со политика. Уште утре да ми поднесете кривична пријава, исто како што јас следната недела ќе Ви поднесам за кривично дело „попречување на правдата” и за стек на кривични дела „одавање службена тајна” – одговори Апасиев.

На Тошковски му е срам да го слуша Талевски

Пратениците Миле Талевски од СДСМ и Блерим Беџети од ДУИ поставија неколку прашања во врска со истрагата за трагедијата во Кочани. Обвинија за селективност и дека одговорните во ОВР Кочани и СВР Штип кои вечерта биле на работа не се опфатени со истрагата. И двајцата опозициски пратеници побараа Тошковски да поднесе оставка од морални причини.

Тошковски возврати дека за трагедиите во „модуларната болница“, за „Ласкарци“ и за „ Беса транс“, МВР не поднело ниту една кривична пријава, додека за пожарот во Кочани се поднесени две кривични пријави за 34 лица, од кои 31 лице се во притвор – членови на СДСМ, на ВМРО-ДПМНЕ, на ДУИ, и ниеден од нив не е во оваа постапка заради тоа што е член или не е член на одредена партија.

– За овие лица се обезбедени докази за основи на сомнение. Истрагата е во тек, и допрва ќе се знае колку лица ќе бидат опфатени од процесните дејствија од обвинителството и МВР – рече Тошковски.

Тој му одговори на Талевски дека му е срам да го слуша, бидејќи ја манипулира јавноста со лаги, со закони кои не постојат и членови кои се однесуваат на друга фактичка состојба, со цел од гневот и бесот на македонските граѓаните политички да профитираат.

Талевски праша како е можно да не бидат предмет на истрага функционери кои вечерта биле на функции, а не презеле никакви мерки за спречување или заштита во дискотеката во Кочани, а меѓу нив и Томо Донев, началникот на криминалистичката полиција на Кочани. Според него, Донев бил близок до ВМРО-ДПМНЕ, за што покажа фотографија на која се гледа дека тој е во партиски штаб.

Министерот одговори дека за Донев се води дисциплинска постапка од внатрешната контрола во МВР. Талевски рече дека не е задоволен од одговорот зашто министерот не му одговорил на ниту едно прашање.
На прашањето на Блерим Беџети за лиценцата и за тоа кој го држел овој бизнис отворен, Тошковски возврати со контра прашање.

– Кој го држел овој бинис отворен, прашувате вие кои управувавте со тоа министерство 20 години. И сега ме прашувате мене, хахаха – беше реакцијата на Тошковски.

Беџети, пак, со контрапрашање до Тошковски рече дека е висок функционер на ДУИ и дали тој мисли дека немаат информации „кој седнува на состаноците и дава насоки, вие или друг“.

– Ако Крешник погрешил, нека одговара. Секој кој погрешил нека одговара.
Не сум задоволен од одговорот, дајте оставка и нека продолжи истрагата – рече Беџети.

Беџети го обвини премиерот дека се мешал во правосудството кога на прес-конференција Мицкоски дал обвинителски квалификации за случајот со дискотеката.
Мицкоски негираше и потенцира дека никогаш не дал изјава во која осудил некој предвреме.

– Јас никогаш не се изразив како што вие велите, било кого да осудам предвреме. Иако ние како политичка партија знаеме што значи да се биде жртва на такви квалификации, сме го почувствувале тоа. За нас важи правилото: не им го прави на другите тоа што не сакаш да ти го прават тебе – рече Мицкоски.

Тој прецизира дека неговите изјави биле внимателни и со „триста огради“, а целта била да се укаже на можноста за постоење фалсификувана документација поврзана со клубот каде се случи трагедијата.

– Точно е дека јавно кажав, со триста огради, дека може да влијаам на истрагата ако кажам дека постои фалсификуван документ – лиценца. Потоа се провери архивскиот број и беше утврдено дека под тој број се води друг документ. Лиценците ги издава Министерството за економија, а од 2008 година па наваму министри биле предлози на ДУИ. Клубот започнува со работа во 2012 година, токму кога министерот бил од ДУИ – рече Мицкоски и праша кој ги потпишувал тие документи.

Тој додаде дека е најдобро да се почека да заврши истрагата, по што ќе се утврди дали имало селективен пристап.
Беџети незадоволен од одговорот го праша премиерот кој закон му овозможува да спроведува правда со влечење за уши, алудирајќи на негова претходна изјава. Беџети констатираше дека имало дофрлување „според нашиот“, па искоментира.

-Ооо… тогаш важи вашиот закон во оваа држава, не законите и Уставот. Се надевам дека целата јавност го слуша овој одговор, дека од законот на премиерот Христијан Мицкоски, можат да се влечат луѓе за уши – рече Беџети.