На прашањето на неделата што го објави Слободен печат, а е поврзано со тоа како да се спречи нелегално градење на државното земјиште најголем дел од граѓаните или 45,56 проценти одговориле дека решението е затворски казни за сторителите, додека 28,11 отсто одговориле дека може да се спречи со уривање на дивоградба.

Од вкупниот број одговори, 15,38 проценти од граѓаните сметаат дека нелегалното градење на државно земјиште може да се спречи со конфискација на изградена дивоградба, 5,92 отсто од изјавиле дека решението се повисоки парични казни, а останатиот дел сметаат дека може да се спречи со зајакнати ингеренции на инспекторите, огромни суми за легализација, додека 1,78 проценти не знаат како би го спречиле нелегалното градење.

Според градоначалникот на Општина Центар, Горан Герасимовски еден добар пример и една конфискација ќе ги натера оние кои сакаат да изградат на диво одреден објект да размислат дали би почнале такво нешто.

Во општина Центар, рече Герасимовски има дивоизградени објекти и на државно земјиште и во зелена зона. За онеспособување на два такви поголеми објекти сумите се енормно високи, а за целосно отстранување на урнатините уште три пати повеќе. Онеспособувањето пак, оценува Герасимовски, не е решение затоа што објектите најчесто стануваат засолништа за бездомници.

Ние зборуваме само за да ја оневозможиме функционалноста на објектите за што се соочуваме со големи трошоци за рушење, а тоа се околу 5,5 милиони за две згради да ги оневозможиме да бидат функционални. Уште три пати повеќе ќе чини нивно целосно отстранување од парцелите. Доколку само ги оневозможиме и ги оставиме истите се соочуваме со поголем проблем да во истите се вселат бездомници кои прават дополнителни проблеми на населението во тој реон. Има поголем број на кражби, се палат одредени предмети кои го загадуваат воздухот и слично и поради тие причини и проблеми со кои се соочуваме бараме начин да и покрај рушењето да има начини за конфискација на одредени вакви дивоградби, појасни Герасимовски.

Според него, идејата на општината е проблемот да се реши како во околните земји, преку решавање на проблемот како во минатото односно со делумна конфискација. Сите оние средства коишто се трошеле за конфискација, за оневозможување на дивоизградените објекти во некои случаи да бидат конфискувани од страна на државата и да бидат пренаменети за други потреби односно да бидат или пензионерски домови или предадени за социјално загрозени семејства итн, соопшти Општина Центар.

За предлог Иницијативата за конфискација на нелегално изградени објекти, Герасимовски напомена дека целта на нејзиното носење е да се конфискуваат објекти коишто се изградени на државно земјиште или зелен појас каде што има непознати сторители. Иницијативата беше доставена до ЗЕЛС во април.

Преку оваа Иницијатива сакаме да интервенираме во две законски решенија – Законот за постапување со бесправно изградени објекти и Законот за управување со конфискуван имот, имотна корист и одземени предмети во кривичната и прекршочна постапка. Ако оваа Иницијатива стане реалност, општините по конфискацијата ќе ги користат објектите за потребите на своите граѓани, изјави градоначалникот Герасимовски.