Идрис Елба откри дека му се заканувале со пиштол, кога се обидел да интервенира во расправија меѓу пар надвор од ноќен клуб, пишува „Дејли мејл“.

Во неодамнешната епизода на подкастот „Смартлес“, кој го води актерското трио Џејсон Бејтмен, Шон Хејс и Вил Арнет, 50-годишниот актер се присетил на инцидентот, во кој за малку можел да умре.

„Човекот се втурна во лицето на девојката и врескаше: „Ќе те убијам!“ Му пријдов и му реков: „Види колку е убава. Зошто зборуваш така со оваа прекрасна принцеза?. Но, тогаш тој извади пиштол и го впери во мене“, раскажал актерот за шокантниот момент.

„Го впери пиштолот во мене и ми рече: „Зборуваш за мојата девојка?. Мислеше дека се обидувам да ја заведам. Се сеќавам дека мислев: „Не си играј преговарач“, продолжил тој.

Актерот изјавил дека сепак инцидентот бил решен и дека за среќа никој не бил повреден.

Во подкастот, тој раскажал и како се запознал со принцот Хари и за ангажманот како диџеј на свадбата со Меган Маркл во мај 2018 година.

Инаку, Идрис требаше да ја игра познатата улога на Џејмс Бонд, но неодамна откри дека решил да ја одбие понудата, бидејќи премногу се дискутирало за неговата раса.