Според информации на Телма двајцата убиени во нападот во бар во Старата скопска Чаршија се Јетон Кривањева и Енес Исени. Како што пишува телевизијата, и двајцата им подлегнале на повредите на местото на злосторството.

Во нападот, кој се случил во „Шиша бар“, е рането уште едно лице кое било во друштво на жртвите.

Кривањева според повеќе медиуми на албански јазик од Македонија беше дел и од групата која беше цел на вооружен напад во скопскиот хотел Александар Палас во 2019-та година.

Од Министерството за внатрешни работи без поголеми детали ги соопштија првите официјални информации за двојното убиство кое вечерва се случи во Старата скопска чаршија во Скопје.

„На 06.03.2023 во 20.11 час. во СВР Скопје пријавено е дека во угостителски објект во Скопје неколку лица пукале кон Ј. К. и Е. И., кои починале на лице место, и кон А.Т., кој е пренесен во болница за укажување лекарска помош“, велат од МВР.

Полицијата ја има блокирано улицата „Самуилова“, која поминува меѓу Калето и Старата скопска чаршија и не дозволува приод до местото на злосторството.