Познатата мексиканска ТВ водителка, Дебора Естреља загина на 43-годишна возраст во авионска несреќа. Мексиканскиот канал „Мултимедија“, за кој работеше Дебора, ја потврди оваа трагична вест во објава на социјалните мрежи, пренесува „Дејли мејл“.

„Во ‘Мултимедија’ сме шокирани и длабоко тажни поради загубата на нашата колешка. Дебора Естреља, 43 години, беше водителка на утринската емисија ‘Теледиарио’ во Монтереј од 2018 година, како и на вестите на ‘Миленио Телевизион’ и ‘Теледиарио’ во Мексико Сити на Канал 6 за време на викендите. Дебора почина во сабота, 20 септември, во авионска несреќа регистрирана во општината Гарсија, Њу Леон. Наше најдлабоко сочувство до нејзиното семејство и најблиските. Почивај во мир, драга колешка“, напишаа од телевизијата во соопштението.

Според извештаите, таа учела да пилотира кога авионот се урна. И Дебора и нејзиниот инструктор Брајан Балестерос загинаа кога нивниот мал авион се урна. Трагедијата се случи во близина на индустриска зона во Гарсија, кратко откако Дебора објави преку интернет дека учи да лета.

Шпанскиот портал „Инфобае“ откри дека несреќата се случила околу 18:50 часот, кога авионот одеднаш паднал во близина на реката Пескерија.

 

View this post on Instagram

 

A post shared by Debora Estrella ⭐️ (@deboraestrella)

Тие додадоа: „Брзата реакција на Единицата за цивилна заштита 04 и другите спасувачки екипи не успеаја да ја спречат смртта на двете лица“.

Дебора беше истакната ТВ водителка, таа редовно споделуваше фотографии од работа. Нејзината последна фотографија од работа беше објавена непосредно пред нејзината трагична смрт, а покрај фотографијата напиша: „Добар ден“, додека позираше во студиото во црна облека со насмевка на лицето.

Обожавателите ѝ оддадоа почит на покојната ѕвезда под објавата за нејзината смрт, а еден напиша: „Многу ни е жал за загубата на Дебора, прегратки до целото семејство“.