Пожарникари од ноќната смена на доброволната бригада од хрватското гратче Супетар на островот Брач, синоќа излегле на посебна „интервенција“ – тие се одзвале на повик од деца на кои им заглавила топка на една од палмите во центарот на гратчето.

Пожарникарите, кои секое лето имаат многу посериозни задачи во справувањето со шумските пожари, кои не се реткост на Брач, за „Телеграм“ велат дека секогаш кога децата ќе повикаат помош, тие без размислување излегуваат на терен.

„Екипата веднаш се спушти до центарот, ја рашири скалата, ја симна топката, се сликаше со децата и се врати назад. 10-минутна интервенција“, велат тие и додаваат дека „балунот (топката) во Далмација е најважната работа“, па затоа оваа ситуација била итно решена.

Според пожарникарите, тие многу работат со децата, учејќи ги дека секогаш им стојат на располагање, па затоа и не е чудно тоа што децата во оваа ситуација веднаш се сетиле да ја побараат нивната помош.

А пожарникарите на Супетар се навикнати да им помагаат, особено кога станува збор за вакви необични случаи со кои се поврзани деца.

„Веќе сме им симнувале велосипеди од дрвја, а и оние палки на мажиретките, секогаш летаат нагоре. Веќе не ни броиме колку мачки сме спасиле“, вели командантот на Доброволното противпожано друштво од Супетар, Никола Мартиниќ Драган. Тој додаде дека ваквите „интервенции“ се многу важни бидејќи ги зближуваат луѓето, особено во помалите заедници.