Полицијата во Јужен Јоркшир соопшти дека најмалку 10 полицајци се повредени, вклучително и еден кој изгубил свест во „ужасното насилство“ пред хотелот „Холидеј ин експрес“ во областа Манверс во Ротерхем.

„Апсолутно ги осудуваме немирите на кои бевме сведоци, во кои учествуваа околу 700 луѓе“, се вели во соопштението на полицијата.

„Насилниците фрлаа дрвени штици кон нашите полицајци и ги прскаа со противпожарни апарати пред да ги скршат прозорците на хотелот за да влезат во зградата. Запалена е и голема корпа за отпадоци во близина на прозорецот на хотелот, при што настана мал пожар кој подоцна беше изгаснат, а меѓу другото кон полицијата беа фрлени стаклени шишиња и канти со пиво“, соопштија од полицијата.

„Повредени се најмалку 10 полицајци, а еден е без свест по повреда на главата. Неколку полицајци се здобија со скршеници на коските. Во денешните нереди нема повредени вработени во хотелот, ниту жители“, соопштија од полицијата.

Стотици антиимиграциони демонстранти нападнаа хотел во Јужен Јоркшир кој се користи за сместување мигранти. Дел од нив упаднаа во објектот и ја запалија околната трева.

Нередите низ Англија и Северна Ирска започнаа во вторникот во Саутпорт, по убиството на три млади девојки во напад со нож на час по танц. Гневот на дел од јавноста беше предизвикан откако беше соопштено дека напаѓачот е илегален имигрант. Властите веднаш ги демантираа лажните вести, посочувајќи дека лицето е родено во Кардиф.

Повеќе од 100 луѓе беа уапсени по демонстрациите организирани од десничарски групи, кои предизвикаа нереди во неколку британски градови. Нередите зафатија подрачја вклучувајќи ги Хал, Ливерпул, Бристол, Манчестер, Сток-он-Трент, Блекпул и Белфаст, резултирајќи со насилство, грабежи и напади врз полицијата. Во Ливерпул, тензиите ескалираа додека околу 1.000 антиимиграциони демонстранти, некои извикувајќи исламофобични навреди, се судрија со контрадемонстрантите, известија денеска локалните медиуми.