Европскиот систем за предупредување за безбедност на храната објави дека се повлекуваат замрзнатите лигњи од пазарот поради сериозен ризик по здравјето на луѓето. Имено, официјалните контроли на словенечкиот пазар открија кадмиум во овој производ, кој може сериозно да го загрози здравјето на потрошувачите, особено што во лигњите имало двојно повеќе кадмиум од дозволената вредност. Дистрибутер во Словенија била компанијата „Рибаго д. о. о.“, велат од локалната управа за храна и ветеринарство – пишува Политика.рс.

Земјата на потекло е непозната, велат од словенечкиот инспекторат, но европскиот систем наведува дека во Словенија и Хрватска пристигнале преку Шпанија. Не се знае дали Државниот инспекторат во Хрватска ги извршил потребните контроли, односно што се случило со спорните  замрзнати лигњи. Кадмиумот е тежок метал, исклучително токсичен и канцероген за луѓето, а најмногу влијае на белите дробови, срцето, црниот дроб и коскеното ткиво. Се акумулира во телото и се излачува тешко и долго време. Во секојдневниот живот, пушачите на тутун се најмногу изложени на кадмиум: една цигара содржи околу 2 микрограми кадмиум, а 2 до 10 проценти од тој кадмиум преминува во чад од тутун.

Експертите велат дека повеќето намирници содржат кадмиум во траги, а најголема количина има во школките, лигњите, печурките, производите на база на какао, како и во многу житарки (ориз) и зелен лиснат зеленчук (марула, спанаќ, зелка) , како и компирот. Кадмиумот има способност да се акумулира во одредени организми, но и во растенија како што е какаото.

Експертите велат дека децата можат да бидат изложени на овој метал преку играчки и детски накит што ги ставаат во уста за време на играта. Има информации и дека синџирот ресторани за брза храна „Мекдоналдс“ повлече 12 милиони чаши со ликот на детскиот херој Шрек во 2010 година поради последователно утврдени покачени концентрации на кадмиум во декоративната боја користена за нивното производство. Експертите велат дека кога еднаш ќе се внесе, кадмиумот полека се излачува и може да се акумулира во црниот дроб и бубрезите и може да остане таму неколку децении. Меѓународната агенција за истражување на ракот го класифицира кадмиумот и неговите соединенија меѓу супстанциите кои можат да предизвикаат рак или да ја зголемат можноста за рак кај луѓето.