Повеќе од еден месец, единствените семафори на една од најфреквентните раскрсници во Велес се надвор од функција, што предизвикува реакции од граѓаните поради зголемен сообраќаен ризик и нарушена безбедност, пишува Дума.мк.

Градоначалникот Марко Колев изјави дека семафорите се поставени пред дваесетина години и функционираат со застарена технологија за која веќе не се произведуваат резервни делови.

– Постојните семафори се поставени пред 20-тина години. Стара техника користена во ново време. Технологијата која се користи одамна е надмината и нема замена за деловите кои се расипани. Тука помош нема. На седница на Совет ќе предложам да се издвојат средства за набавка на нови, со што ќе се реши проблемот – изјави Колев.

Од неговиот Кабинет информираат дека во предлог-измените на Програмата за ребаланс на општинскиот буџет се предвидени средства за нови семафори. Точката е веќе ставена на дневен ред на следната седница на Советот на Општина Велес, закажана за денеска.