Само вчера се прегледани повеќе 100 луѓе на двата пункта во Трубарево, од кои осум беа упатени на Клиниката за пулмологија поради хронични заболувања за кои подолго време не направиле контролни прегледи, соопштија од Министерството за здравство.

-Скринингот опфати клинички преглед, мерење на пулс, сатурација и проценка на витален капацитет. Во текот на двата дена беа прегледани повеќе 200 жители, акцијата имаше голем одѕив и беше добро прифатена од локалното население. Во следниот период ќе продолжиме да ја следиме состојбата во соработка со Клиниката за пулмологија и сите надлежни институции – изјави министерот за здравство, Азир Алиу.

Според информациите од медицинските тимови, пациентите кои биле упатени на Клиниката имале симптоми како потешко дишење, сува кашлица и стегање во градите. Дополнително, кај дел од граѓаните бил детектиран и висок крвен притисок, по што им биле дадени совети да се обратат кај матичните лекари за натамошни испитувања.

Министерството за здравство, во соработка со Клиниката за пулмологија, спроведе дводневен скрининг на населението во Трубарево, со цел навремено откривање на евентуални симптоми на заболувања на дишните патишта, по пожарот во објект со електронски отпад.