Брач, според наводите на хрватските медиуми, стана ново жариште на коронавирусот во Хрватска.

Пред неколку дена на островот стигнале бројни епидемиолози, а кризниот штаб рекол дека во последните 24 часа веќе се регистрирани 9 случаи на заразата.

– Сите позитивни се во самоизолација, во постојан контакт се со здравствените работници и под надзор на полицијата. Под стручно водство на епидемиолошките служби од Сплит во тек се процедури на протоколите за постапување во вакви случаи, напишала Ивана Марковиќ, градоначалничката на Супетар на Фејсбук.

Таа навела дека се „потврдени најлошите сомневања“.

– Сите жители на нашиот остров ги повикуваме на присебност и смиреност. Однесувајте се одговорно, не подлегнувајте на паника и непроверени информации и придржувајте се на сите мерки кои се на сила, порачале од Кризниот штаб на островот Брач.

Марковиќ рекла дека не знае кој ќе биде одговорен во овој случај.

– Или ќе биде „никој не е виновен“, „виновен е вирусот“, „немаше пропусти“, но апелирам до националниот штаб да се донесат професионалци кои ќе знаат да се справат со оваа ситуација. Нашиот остров се соочува со епидемија и ги молам сите наши граѓани да внимаваат и наредните денови да останат што е можно повеќе дома, напишала градоначалничката.

Таа рекла дека и самата до скоро била во самоизолација, бидејќи била во близок контакт со едно лице кое е во близок контакт со заразен.

– Чувајте се сите, рече Марковиќ.