Компанијата „Јунајтед груп“ денес објави, во врска со објавувањето на аудио-снимка од телефонски разговор помеѓу извршниот директор на компанијата, Стен Милер, и извршниот директор на „Телеком Србија“, Владимир Лучиќ, дека станува збор за рутински деловен разговор, нагласувајќи дека снимката е нецелосна и не ја одразува целата содржина или контекст на разговорот.

Според компанијата, се работи за деловна комуникација.

„Претходно „Јунајтед груп“ продаде неколку различни средства на ‘Телеком Србија’. По таа зделка, рутински и неопходно е да има комуникација помеѓу двете компании“, се вели во соопштението на „Јунајтед груп“, објавено од Н1.

Оттаму велат дека снимката не е целосна и контекстот не е тој што е прикажан во медиумите, така што во ниту еден момент „Телеком Србија“ или некој друг не вршел притисок за да се отпушти од работа Александра Суботиќ, која е трн во око на српските власти поради нејзината независност.

„Јунајтед груп“ не потпаѓа под политички влијанија од кој било тип. Александра Суботиќ не е вработена како член на уредништвото во ниту една медиумска организација на ‘Јунајтед груп’. Наводите во медиумите дека госпоѓа Суботиќ е дел од уредништвото се неточни. Таа работи во менаџерскиот тим на „Јунајтед груп“ и останува на својата позиција. Господин Милер, самиот во снимката вели дека нема да ја отпушти“, се наведува во соопштението.

Компанијата нагласува дека е цврсто посветена на одржување доследни и јасни граници помеѓу раководството и уредништвото и дека неодамна ангажирале двајца меѓународни експерти за да спроведат ревизија во информативните редакции, со цел да се осигура независноста на новинарите.

Претходно директорот на „Телеком Србија“, Владимир Лучиќ, вчера, веднаш откако беше објавена снимката од телефонскиот разговор, ги отфрли сите шпекулации дека во име на српската влада се меша во раководењето на Н1. Притоа и тој рече дека се работи за деловен разговор.

„Новиот директор на ‘Јунајтед груп’, Стен Милер, го познавам речиси два месеца и не се тајни разговорите како партнери кои учествуваа во зделката при која ‘Телеком Србија’ купи дел од ‘Јунајтед груп’“, рече Лучиќ.

Според Лучиќ, деловната пракса и правните норми ги обврзуваат претставниците на компаниите да имаат постојана комуникација која треба да обезбеди ефикасна транзиција на сите деловни функции.

„Во разговорот со господинот Милер не стана збор за медиумите кои се во сопствеништво на „Јунајтед груп“ ниту некој се осудил да влијае на уредувачката политика“, рече директорот на „Телеком Србија“.

Како што пренесуваат српските медиуми, тој најави кривични пријави за медиумите кои го објавиле разговорот бидејќи смета дека му е нарушен угледот.

„Ќе ве запалиме, само чекаме дозвола“: Редакцијата на Н1 во Србија мета на секојдневни закани