Во Хрватска е потврден случај на антракс, опасна заразна болест која ги погодува животните, но може да се пренесе и на луѓето, пренесува Н1 телевизија.

Инфекцијата е откриена во општина Врлика, а надлежните органи веднаш покренаа низа итни мерки, вклучувајќи задолжителна вакцинација на добитокот и превентивен третман со антибиотици за лицата кои биле во контакт со заразен добиток, беше објавено на вонредна прес-конференција во Загреб.

Според хрватскиот министер за земјоделство, Давид Влајчиќ, досега се тестирани 13 примероци, а првиот позитивен резултат за антракс е добиен вчера на 18 јули.

Три примероци сè уште се обработуваат.

„Веднаш ги информиравме сите надлежни органи. Ситуацијата е критична. Притисокот врз системот е огромен, но сега конечно имаме поцелосна слика и можеме да дејствуваме решително“, рече министерот.

Иако не може со сигурност да се каже дека сите четириесет мртви говеда биле заразени со антракс, во тек се токсиколошки анализи за да се разјасни причината за смртните случаи на добитокот.

Влајчиќ потврди дека сите животни од засегнатата фарма ќе бидат вакцинирани, а месото од заразените животни не смее да се користи.

Директорот на Хрватскиот институт за јавно здравје, Крунослав Чапак, потврди дека епидемиолошката служба реагирала веднаш по добивањето на информациите за потврдениот случај.

„Ги идентификувавме сите лица кои биле во контакт со заразениот добиток. Сите ќе добијат антибиотици како превентивна мерка во следните десет дена“, рече Чапак, додавајќи дека „ризикот за општата популација не е висок“ и дека претходното искуство од Лоњско Поље покажува дека болеста ефикасно се сузбива со навремени мерки.

Како што беше најавено, вакцините веќе се доставени, а имунизацијата ќе започне на почетокот на следната недела.

Според претставниците на Хрватскиот ветеринарен институт, производите од заразени животни, вклучувајќи месо и млеко, не смеат да се користат, а фармата останува под мерки сè додека не се заврши вакцинацијата и добитокот не стекне имунитет.

Труповите ги преземаат концесионерите, а нивните примероци се анализираат.

„Сомневањето за заразна болест автоматски значи забрана за трговија и употреба на сите производи од животинско потекло“, беше нагласено на прес-конференцијата.

Антраксот е болест која најчесто се пренесува преку контакт со заразени животни или контаминирани материјали, но не е многу заразна меѓу луѓето. Инфекцијата може да се случи ако бактериските спори дојдат во контакт со отворена рана, но ваквите случаи се многу ретки. Епидемиите најчесто се јавуваат по поројни дождови и поплави, кога спорите излегуваат од почвата.

И покрај мерките, некои во јавноста и опозицијата изразуваат загриженост за доцнењето во дијагнозата. Имено, првите примероци доставени на 7 јули не покажаа присуство на болеста, поради што сомневањата беа насочени и кон можно труење.

Дури по неколку негативни наоди беше потврден еден позитивен примерок.

Антраксот ќе се следи во наредните недели преку дополнителни анализи и надзор. Надлежните служби велат дека нема простор за паника, но дека строгото спроведување на мерките за биолошка безбедност е клучно. Граѓаните кои се во контакт со животни во погодените подрачја се повикуваат да бидат претпазливи, а сите случаи на смрт треба веднаш да се пријават на ветеринарната инспекција.