Потресна исповед на поранешниот голман на Јунајтед: Да испиев уште една чашка алкохол, ќе бев мртов
Кога ќе се спомене името на Рој Керол, првата асоцијација за поранешниот голман на Манчестер јунајтед е дека беше еден од актерите на тепачката помеѓу Рој Кин и Патрик Виеира во тунелот по дуелот меѓу Јунајтед и Арсенал.
Но, денеска прва асоцијација за поранешниот голман е дека е повторно роден. Тој по завршување на кариерата му се оддаде на алкохолот и дојде до стадиум на хронична депресија.
За тоа колку беше лоша состојбата, открива самиот Керол.
– Бев алкохоличар без престан дури десет години. Тоа беше навика која ми стана секојдневна рутина. Ќе испиев неколку пијачки една вечер, па следната повторно… И потоа знаеш дека си алкохоличар – ја започнува Керол својата исповед за „Дејли Мејл“.
Проблемите со алкохолот на поранешниот голман на репрезентацијата на Северна Ирска започнаа во 2006 година кога се повреди додека бранеше за Вест Хем. Поради проблемите со грбот тој неколку месеци беше „врзан“ за креветот.
– Пред таа повреда, никогаш не бев толку долго повреден и западнав во поголеми проблеми. Седев во темна соба и пиев. Никој не ми помогна, никој не ми рече дека тоа не е добро. Но, никој не можеше да ми помогне бидејќи никогаш не зборував за тие работи. Сите мислеа дека сум најсреќниот човек на светот. Но, кога ќе дојдев дома, ќе ја затворев вратата, јас почнував да ја удирам главата во ѕид. Потоа ќе испиев неколку чашки алкохол и ќе заборавев на се. Така се лекував од депресија, но тоа не беше никакво решение. Секој ден истото и состојбата стануваше се полоша – вели Керол.
Препорачано
Кога дел од најблиските пријатели сфатија дека Керол има голем проблем, тој започна со рехабилитација.
– На рехабилитацијата одев само за да ги задоволам сопругата, пријателите, агентот. Не приметував дека нешто не е во ред со мене и тоа беше мојот најголем проблем.
Лошите навики на Керол продолжија и кога го бранеше голот на Ренџерс, Дерби на Одензе. Токму по враќањето од Данска, работите станаа полоши.
– Девет месеци немав клуб. Додека имав клуб, секогаш се обидував да не пијам пред натпреварите. Но, потоа никој не ме сакаше и почнав да пијам како луд. Да не запрев, сигурно ќе бев мртов, ќе се самоубиев. Но, успеав. Се разбудив едно утро и бев подготвен за новиот живот без алкохол – вели Керол.
Поранешниот голман и понатаму беше одвоен од сопругата и двете деца, но кога таа дозна дека повеќе не пие, веднаш го повика да им се придружи, по што се свртеа работите. Наскоро доби повик да се пресели во ОФИ од Крит, а добрите игри го однесоа на голот на Олимпијакос.
