Адвокатот Бојан Манев, кој е бранител на обвинетиот Боре Видевски во случајот со убиството на Вања Ѓорчевска и Панче Жежовски, бара предметот да се врати или во фаза на истрага или да се одреди реконструкција со која би се разјасниле многу отворени прашања.

Во спротивно, според него, каква и да биде пресудата, таа ќе подлежи на жалби.

-Низ исказите на сите обвинети неминовно произлегува потребата или од реконструкција на настанот или од враќање на предметот во истражна постапка, затоа што ако ги следите исказите, се споменуваат други лица кои што биле учесници во настанот, а не се на обвинителна клупа. Понатаму, се кријат, односно не се изведуваат докази од битно значење – изјави Манев.

Тој рече дека постијат неколку снимки кои обвинителството од непознати причини не им ги дава да ги гледаат.

-Едни од таквите снимки, се снимките кај бензиската станица Лукоил во Велес, каде јасно се гледа ликот на Панче Жежовски, направена некаде во 12 часот на 22 ноември, а тие во обвинение викаат дека во 9 часот човекот е убиен – изјави Манев.

Третата работа, зошто овој предмет треба да се врати во истрага, според Манев, е тоа што Обвинителство нема дадено никакво вештачење на зрната оружје, со цел да се утврди дали станува збор за легално или нелегално оружје.

-Работа на обвинителство во истражна постапка е да ги утврди сите факти и да ги повика луѓето. Зошто обвинителство тоа не го прави, како што не изведува и други докази кои што се од битно значење, тоа треба да ги прашате обвинителките – нагласи адвокатот.

Денешното рочиште се одложи поради отсуство на адвокатот на првообвинетиот Љупчо Палевски.

Следното рочиште, закажано на 23 април треба да продолжи со сведочење на првообвинетиот Љупчо Палевски, којшто треба да одговара на вкрстени прашања на Обвинителството и одбраната на останатите обвинети.