По неколку недели интензивни преговори, италијанскиот гигант Милан конечно успеа да се договори со Клуб Бриж за трансферот на швајцарскиот репрезентативец кој има и македонски пасош, Ардон Јашари. Белгискиот клуб ја прифатил понудата вредна 39 милиони евра, со што „росонерите“ го обезбедија потписот на еден од најперспективните дефанзивни фудбалери од средниот ред во Европа.

Иако интерес за Јашари имаше и од Премиер лигата и Бундеслигата, одлучувачка била неговата желба да го облече дресот на Милан. Како што пренесуваат италијанските медиуми, трансферот треба да се официјализира до крајот на неделата, кога 21-годишниот фудбалер ќе пристигне во Милано на лекарски прегледи и ќе стави потпис на договорот.

Јашари зад себе има солидна сезона за белгиски Бриж и на 25 натпревари запиша два гола и четири асистенции. Претходно, тој настапуваше само за швајцарски Лузерн, клуб во кој ја започна својата професионална кариера, пред да се пресели во Белгија минатото лето.