Компресорската станица на Клинички центар „Мајка Тереза“ од која зависат сите операции во хируршките клиники, после 9 месеци откако се расипа – е променета со нова. На тендерот се пријави само една фирма и ја заврши работата во предвидениот рок. Министерот за здравство Арбен Таравари вели дека компресорската станица веќе функционира, има 3 нови компресори, нова инсталација а стариот компресор уште ќе стои во употреба за замена, доколку дојде до некоја несакана ситуација.

-Со новата компресорска станица покриени се сите 18 хируршки сали на хирургија и салите во ОРЛ, Офталмологија и Максилофацијална хирургија. Комплетниот систем беше тестиран 10 дена и се функционира како што треба, компресорската станица веќе се користи, рече Таравари.

Старата компресорска станица како што откри „Слободен печат“ дистрибуирала гасови што не се според европски стандарди, што не е случај со новата – од која се дистрибуираат медицински гасови според европската фармакопеја. Ако се поврзе инсталација, и други клиники би можеле да се приклучат на оваа компресорска станица. Во периодот од 9 месеци додека надлежните спроведуваа тендери од кои на првиот никој не се пријави – пациентите беа оперирани на Клинички центар со надворешни компресори.

Додека пациентите што треба да се оперираат добија услови со новата компресорска станица, пациентите на дијализа се соочуваат со проблеми. Нивниот превоз кој досега бил со такси компанија до дијализните центри, на некои места е заменет или со комбе или пак користат градски превоз на ЈСП, што согласно нивната здравствена состојба и тоа што се работи за лица со телесен инвалидитет, со слепило, без еден екстремитет претставува огромно малтретирање. Таравари вели дека концесионерот требало да го реши проблемот.

Таравари најави дека на лето ќе се почне со реновирање на болниците во Штип и Кичево. Болницата во Кичево чека 30 години на реновирање. Точни рокови за кога болниците ќе се довршат, нема. Таравари смета дека нови болници за 6 месеци не може да се изградат.

-За жал за 30 години не е изградена ниедна нова болница. Струмица, Св. Еразмо, Штип, Кичево кои се започнати, останати се какви што биле. Работено е некоја година и оставено е. Се надевам некои од нив ќе ги продолжиме, вели Таравари.

Министерот за здравство за онколошките пациенти потврди дека целосната биолошка терапија која недостасуваше е обезбедена и повтори дека другите болници ќе мора да дистрибуираат терапија за онколошките пациенти во внатрешноста, за да се намали притисокот на Универзитетската клиника за радиотерапија и онкологија на Клинички центар „Мајка Тереза“.

-На таков начин, ќе останат најтешките пациенти да бидат третирани на Клиниката за Онкологија во Скопје, смета министерот. 

Таравари го охрабри Државниот здравствен инспекторат да ја тужи Детска Клиника затоа што таа не плати глоби за констатирани недостатоци и прекршоци.