Поранешниот шеф на пропаднатата берза за криптовалути ФТХ официјално ги отфрли обвиненијата дека ги измамил клиентите и инвеститорите, пишува „Би-Би-Си“.

Сем Бенкмен-Фрид се изјасни за невин пред американскиот суд за тврдењата дека земал депозити на клиенти во ФТХ за да ја финансира својата друга фирма, „Аламеда Рисрч“, за да купи имот и да дава политички донации.

Тој беше ослободен по неговото апсење минатиот месец со кауција од 250 милиони долари.

Но, доколку биде прогласен за виновен, се соочува со повеќе од 100 години затвор.

Двајца од најблиските колеги на Банкмен-Фрид веќе се изјаснија за виновни и соработуваат со истрагата, која ја потресе целата индустрија за криптовалути.

Во интервјуата пред неговото апсење, 30-годишниот поранешен милијардер призна дека има пропусти, но ги сведе проблемите на сопствените „грешки“.