Поранешниот претседател на Европската централна банка и италијански премиер Марио Драги ја предупреди претседателката на Европската комисија, Урсула фон дер Лајен, дека неактивноста го загрозува суверенитетот на Европската Унија, објавува „Ла Република“. Пред една година, Драги го претстави својот план за економска трансформација на Унијата, нарачан од Европската комисија.

Во тоа време, тој нагласи дека на ЕУ ѝ е потребна „радикална промена“ за да избегне губење на трката од Кина и САД. Една година подоцна, тој предупреди дека ситуацијата се влошила. Во првите 12 месеци, само 11 проценти од поставените цели биле исполнети. Драги рече дека јавниот долг на ЕУ ќе се зголеми за десет процентни поени во текот на следната деценија. Покрај тоа, би биле потребни 1,2 трилиони евра годишни инвестиции, наместо претходно проектираните 800 милијарди, пренесува Политика онлајн.