Грузискиот суд денеска го осуди поранешниот претседател на земјата Михаил Саакашвили, кој е во затвор од 2021 година и веќе беше осуден на уште девет години затворска казна минатата недела, на четири и пол години затвор, изјави неговиот адвокат за агенцијата Франс прес.

Саакашвили „беше осуден на четири години и шест месеци затвор за илегално преминување на грузиската граница“ по неговото враќање од егзил во 2021 година, изјави неговиот адвокат Дито Сајаглишвили за АФП .

Со оглед на неговите претходни пресуди во Грузија, „Михаил Саакашвили треба да одлежи вкупно дванаесет и пол години затвор“, објасни судијата Михаил Гинцолија.

Поранешниот претседател на Грузија и невладините организации за човекови права ги осудуваат сите обвиненија против него како политички мотивирани. Саакашвили (57) веќе беше осуден во отсуство во 2018 година на шест години затвор за злоупотреба на власта.

Тој беше уапсен во 2021 година во Грузија, по враќањето од егзил, на издржување на оваа казна. Саакашвили го поминал својот егзил во Украина, чиешто државјанство го стекнал и каде што ги преземал службените должности.

Минатата недела, Градскиот суд во Тбилиси го осуди на девет години затвор, со што додаде уште три години на неговата првична казна. Затворен од 2021 година, Михаил Саакашвили е хоспитализиран во Тбилиси од 2022 година, откако штрајкуваше со глад 50 дена.

Европскиот парламент побара негово итно ослободување, додека украинскиот претседател Володимир Зеленски повика Михаил Саакашвили да биде префрлен во Киев.

Михаил Саакашвили, кој студирал во САД и Франција и зборува пет јазици, дојде на власт во 2003 година со Револуцијата на розите, која мирно ги собори старите елити наследени од советскиот период.

И покрај затворањето, тој останува опозициска фигура во актуелната влада на партијата Грузиски сон, која е обвинета за авторитарно отстапување и дека сака да ја приближи земјата до Москва.