Ракометниот клуб Војводина од Нови Сад донесе контроверзна одлука да го раскине договорот со хрватскиот голман Филип Ивиќ, поради негово присуство на концерт на хрватскиот пејач Марко Перковиќ Томпсон, кој клубот го означи како „усташки собир“.

Од клубот остро реагираа и преку официјално соопштение нагласија дека не станува збор за обичен музички настан, туку за манифестација со политичка и историска тежина што, како што наведуваат, ги навредува чувствата и сеќавањата на српскиот народ.

„Бевме шокирани кога дознавме дека Ивиќ присуствувал на собир на кој се величаат идеи и симболи кои се синоним за злосторства против српскиот народ. За нас тоа е неприфатливо“, се наведува во дел од соопштението.

Од клубот додаваат дека нивните вредности не се темелат на националност или религија, туку на почитување на историјата и достоинството на жртвите низ историјата.

„Никој што стои рамо до рамо со оние што го слават злото, не може истовремено да го носи дресот на клуб што му припаѓа на овој народ“, категоричен е претседателот на клубот Душан Бајатовиќ, кој ја потпиша одлуката.

Ќе потсетиме, Ивиќ летово од Еурофарм Пелистер се пресел во Војводина, но сега заминува без да одигра ниту еден натпревар.