Проектот за бесплатен превоз на сите студенти и од државните и од приватните универзитети, но и за другите граѓани на Скопје беше планиран од апект на поддршката што беше најавена од Владата дека во континуитет ќе го подржуваат студентскиот стандард и тоа ќе биде субвенционирано од страна на централната власт, објасни денеска градоначалничката Данела Арсовска.

Веќе четврта година имаме проблем со тоа централната власт да си го исплати долгот кон ЈСП, тоа се веќе 8 милиони евра, а од почетокот на наредната година ќе бидат 10 милиони евра, така што веќе не можеме да дискутираме за бесплатен јавен превоз не само за студентите од приватните универзитети, туку да прашање е дали било кој воопшто ќе има бесплатен јавен превоз. Сите оние од централната власт што треба да си ги исполнуваат своите обврски во однос на плаќањата кон јавните претпријатија не си ги исполнуваат. ЈСП функционира со генерирање големи трошоци за разлика од претходните години кога се слевале и по 30 милиони евра од страна на централниот буџет во касата на јавните претпријатија – рече Арсовска

На прашањето дали постои можност да се укине јавниот превоз и за пензионерите, Арсовска нагласи дека за тоа ќе мора да одлучат советниците, затоа што тоа зависи пред сѐ од субвенциите кои беа вкалкулирани како влез во буџетот на ЈСП кои во континуитет, повеќе од една деценија стигнуваа за студентите од Владата.

Со тие средства се исплаќаа кредитите кои ги има ЈСП од околу 2 милиони евра годишно, коишто сега Град Скопје ги покрива. Овој 30-годишен загубар се повеќе ќе тоне во долгови без покритие на трошоците, а можеби тоа е и крајната цел со неисполнување на таа обврска – истакна градоначалничката на Скопје.