„Не работиме до…“, „Затворено поради користење годишен одмор“, „Ви благодариме на разбирањето, се враќаме на 12 август“. Ако сакате да нарачате торта, тоа ќе треба да го одложите до средината на август, а таков распоред треба да си направите и за закажување потстрижување или поправка на забите. Традиционално од 2 август, на многу месарници, слаткарници, фризерници, цвеќарници, пекарници, бутици, па дури и на забарски ординации, се залепени известувања дека затвораат поради користење на колективен годишен одмор до средината на август. Дури и на некои од контактните телефони ќе добиете такви информации.

Малите бизниси во Скопје веќе неколку години ја користат првата половина од осмиот месец за „полнење на батериите“, а главното оправдување е дека градот е празен и дека не вреди да бидат отворени колку да се рече. Ова е особено актуелно за локалните занаетчии, кои преку целата година работат сами, бидејќи немаат сила (читај кадар) за втора смена. Слична е ситуацијата и на зелените пазари, на кои во летните месеци не работат дури 30 отсто од тезгите, кои зјаат празни иако за нив се плаќа паушал.

– Едвај го истуркавме јули и пеколните жештини. Работиме со фенови и хауби, климатизерите не може да постигнат, па не ни е пријатно ни нам, а и на муштериите. Овие десетина дена ќе се одмориме, веројатно ќе залади и повторно ќе работиме – велат во една скопска фризерница.

– Мора да затвориме. Нема луѓе, сите се на одмор никому не му е до цвеќе во ова време – посочуваат цвеќарите. – Надвор беше 40 степени, а замислете како ни е нам покрај скарата. И ние сме луѓе, ни треба одмор – одговараат во една месарница во Аеродром, која продава и скара на кило.

Одењето на колективни годишни одмори најмногу го планираат малите претприемачи каде што може да се запре производството без негативни последици. Овие фирми обично планираат колективни одмори во летните месеци, најмногу од крајот на јули до средината на август. Малите бизнисмени тврдат дека ваквата практика покажала позитивни ефекти врз ефикасноста на деловното работење и им ги намалува трошоците. Во последните години сè почеста е практиката да се комбинираат празниците со годишен одмор, што кај нас е најчесто околу илинденските празници.

Според последното истражување на Евростат, повеќе од една третина од Македонците, односно 65,3 отсто не можат да си дозволат годишен одмор во траење од седум дена во странство, а во Србија процентот е 62, 8 отсто. Според Eврофонд, Романците имаат најкраток годишен одмор во ЕУ – 27 дена, вклучително и националните празници, а Германците и Данците водат со 30 дена или 40 кога се вклучени државните празници.

Според податоците на Евростат за 2022 година, 28,6 отсто од граѓаните на ЕУ просечно не можеле да си дозволат еднонеделен одмор во странство.