Со поскапи ски билети и ист капацитет за скијање и инфраструктура како лани, ќе започне ски сезоната на Попова Шапка, откако ќе падне доволно снег додека за инсталација на вештачки снег, засега нема никакви најави. Од „ЕЛЕМ Турс“, јавно претпријатие кое управува со ски центарот, велат дека цената на билетот е неопходно да се покачи, оти и струјата на која работаат ски лифтовите е покачена. Најавија дека се подготвени за сезоната.

Оттаму истакнаа дека се водат разговори за пронаоѓање на стратешки инвеститор за Попова Шапка. Дали ќе стане збор за издавање на концесија на ски центарот, јавно – приватно партнерство или нешто сосема друго, последниот збор го има владата, додаде Адем Авзиу, директор на ЕЛЕМ Турс.

Жарко Трпковски од скијачкиот клуб Љуботен и познавач на состојбите на центарот, вели дека не постои во светот таков инвеститор кој би инвестирал во Попова Шапка каде не се уредени имотно – правните односи, нема основна инфраструктура и има смет насекаде.

,,Имотен лист центарот има само за жичарницата, и тоа само за објектот во Тетово. Не е уредена состојбата со сметот и канализацијата, а нормално дека тој што сака да инвестира, очекува и да не се соочува со проблеми поврзани со основната инфраструктура”, вели Трпковски.

Досега за скијачкиот центар Попова Шапка и оваа и минатата власт, имаа направено голем број физибилити студии, мастер планови, економски анализи за развој на центарот, но тие засега се само на хартија.