Излевањето на Маркова Река во општина Студеничани предизвика материјална штета, но нема опасност по жителите од овој крај, соопштија од Дирекцијата за заштита и спасување.

-Еден тим за брз одговор интервенираше со пумпи за извлекување вода, и истите ќе интервенираат по потреба во текот на денот. Досегашните информации покажуваат дека ситуацијата е под контрола и нема опасност за жителите, освен моментално евидентирана материјална штета – велат од Дирекцијата за заштита и спасување.

Поради врнежите од дожд, синоќа дојде до излевање на Маркова Река кај населеното место Љубош. Поплавени се неколку куќи, магацини и индустриски објекти во селата Студеничани, Батинци и делови кон Пинтија.

Од Центарот за управување со кризи утринава информираа дека поплавен е и дел од булеварот „Борис Трајковски“ кај населбата Пинтија.

Во текот на ноќта, на Единствениот број за итни повици 112 добиени се и пријави за поплавени куќи и во Горно Лисиче.

Од АМСМ информираа дека непроодни се локалниот пат од село Горно Лисиче кон село Долно Лисиче во општина Аеродром и првиот мост во село Батинци.

ЈСП „Скопје“ информираше дека поради поплавите по излевањето на Маркова Река, автобусот со број 70 сообраќа до почетна/крајна станица Дрисла и автобусот со број 33 преку населба Драчево во двете насоки.

Железници на Северна Македонија известуваат дека железничкиот патнички и товарен сообраќај од синоќа, од 22:50 часот е во прекин во правец на Лисиче и Драчево и обратно, додека патничкиот сообраќај се одвива преку станицата Трубарево.