Палестинските групи, вклучувајќи ги Хамас и Фатах, потпишаа заедничка декларација во Кина за надминување на повеќегодишниот спор.

Четиринаесет палестински групи потпишаа заедничка (Пекинг) декларација во кинескиот главен град за ставање крај на нивниот долгогодишен спор. Меѓу нив беа и ривалските групи Фатах и ​​Хамас, јавија  кинеските државни медиуми. Покрај „завршувањето на поделбата“, декларацијата повикува и на „зајакнување на палестинското единство“, објави CCTV. Повеќе детали не се објавени.

Според новинската агенција АФП, високиот функционер на Хамас Муса Абу Марсук потврдил дека неговата организација ја потпишала изјавата. „Ние сме посветени на националното единство и го бараме тоа“, рече Абу Марсук.

Умерениот Фатах ја контролира палестинската управа на Западниот Брег. Милитантниот исламистички Хамас ја презеде власта во Појасот Газа во 2007 година и ги протера претставниците на автономните власти. За прв пат Хамас и Фатах ветија дека ќе стават крај на нивното ривалство во 2011 година. Сепак, обидите за формирање „влада на единство“ веќе неколкупати пропаднаа.

Кинескиот министер за надворешни работи Ванг  оцени  дека помирувањето е „внатрешно прашање на палестинските групи“. Истовремено, рече тој, помирувањето не може да се постигне без поддршка на меѓународната заедница.  Кин ,  според  Ванг, сака да одигра конструктивна улога во обезбедувањето мир и стабилност на Блискиот Исток.

Низ историјата, Кина покажа солидарност со палестинското прашање и го поддржува решението со „две држави“ на израелско-палестинскиот конфликт. Таа предвидува независна палестинска држава која ќе  коегзистира со Израел. Пекинг веќе беше домаќин на двете ривалски палестински организации Хамас и Фатах во април на разговори за „внатрешно палестинско помирување“.