Стотици граѓани ги поминале обуките за негуватели и за лични асистенти за лица со попреченост. Но и да имало уште толку, ќе имало интерес. Проектот е финансиран преку Министерството за труд и социјална политика и опфаќа дваесетина проекти во триесетина општини низ државата, со цел подобрување на социјалните услуги.

Граѓаните што ќе ги завршат обуките за негуватели, може да работат различен број часови и да имаат различен број работни денови. Тоа зависи од договорите со корисниците. Асистентите што работат со лица со попреченост, тоа го прават по 4 часа дневно (без сабота и недела и празници) и добиваат плата од 17.400 денари. Може да работат и на две места. Малку повеќе би биле платени ако работат како негуватели.

Но, и покрај овој износ, често се случува да го завршат курсот, а потоа да не се пронајдат во работата. Уште пострашно е што дел од тие што ќе завршат обука, потоа ја напуштаат нашата земја и како негуватели работат во странство. Нега за стари лица во домашни услови е наменета за опслужување возрасни над 65 години, а асистентите поминуваат обука за тешки телесни инвалиди со потешка и најтешка попреченост и за потполно слепи лица.

– Годинава имавме една обука за негуватели, а мината година направивме пет обуки. Обуките траат три месеци. Проектот трае од 2017 година и многумина успешно ја завршија обуката. За обука луѓе ќе најдеме. Но, ова е тешка работа. Некои, кога ќе го објавиме повикот, ќе аплицираат, а потоа нема да се појават на обука. Некои успешно ќе ја завршат обуката, ама потоа нема да се пронајдат себеси во таа професија. Или, пак, ќе почнат да работат, па набргу ќе се откажат. Но, најголем проблем е што повеќемина ќе ја завршат обуката, а потоа одат да работат во странство – велат во Едукативниот тренинг центар за возрасни на Црвениот крст.

Двете програми – за негуватели и за асистенти на лица со попреченост што се спроведуваат преку Црвениот крст, се верификувани од Центарот за образование на возрасни. Црвениот крст е верификувана организација, од Министерството за образование и наука за спроведување на програмите.

Утре, во Црвениот крст ќе се одржи завршниот испит за лични асистенти со попреченост. Ќе полагаат 14 граѓани, кои од септември ќе им бидат на располагање на граѓаните кои бараат вакви асистенти.

– Има список за чекање, но мислам дека со овие нови асистенти ќе се задоволат потребите. Секако, во меѓувреме ќе се пријават и нови потенцијални корисници. Годинава имавме две обуки. Следната ќе биде наесен или наредната година – велат во Црвениот крст.

Како што може да се прочита на службената страница на Црвениот курс, обуките и за асистент и за негувател чинат по 20.000 денари. Но, од Црвениот крст велат дека граѓаните не плаќаат, затоа што тие бараат и наоѓаат донатори за покривање на цената на обуките. Потоа, платите одат преку Министерството за социјална политика.

Обуката за асистенти за лица со попреченост се реализира во период од 3 месеци за следење 4 модули, вкупно 216 часа. Стручно-теоретски содржини во времетраење од 84 часа се реализираат во училница и се во функција на практичната обука, која пак е со времетраење од 132 часа и се изведува во домови и институции за сместување лица со попреченост, а може и во институции со организиран дневен престој.

Обуката за негуватели исто така се реализира во период од 3 месеци за следење 3 модули, во овој случај тоа се вкупно 250 часа (115 часа теоретска настава и 135 часа практична настава во кабинет и обука на работно место).

По завршување на обуката, кандидатите се стекнуваат со државно признаен сертификат Личен асистент на лица со попреченост или Негувател/ка за помош и нега на стари лица и лица со попреченост.