Пукна тиквата со шпионскиот софтвер Предатор во Грција. Фирмата Интелекса на израелскиот воен разузнавач Тал Дилијан во Атина, од вчера се претресува од полицијата, заедно со куќите на вработените.

Сето ова е поради истрага и основани сомнежи дека моќниот софтвер Предатор, кој може да ги украде сите пораки, фотографии и конверзации од мобилните телефони на следените лица, се злоупотребувал за шпиoнирање политичари опозиционери, новинари, безбедносни лица, бизнисмени, министри и дека на таков начин била опструирана демократијата, слободата и приватноста во Грција но и пошироко.

Уште во август, европратеничката Софи Интвелд која е во одбор за истражување на скандалот во Европскиот Парламент, му испратила писмо на директорот на Интелекса, Тал Дилијан и му поставила и прашања за Северна Македонија:

,,Фирмата Сајтрокс, хостирана од Интелекса, почна како старт ап во Северна Македонија но според Форбс вие ја спасивте од банкрот со пет милиони долари. Корпоративната структура на Сајтрокс се чини раштркана, со корпоративно присуство во Унгарија, Израел и трансфер на акции во корпоративен ентитет на Британските Девствени Острови. Ве молам дајте ни информации за вашата сегашна и поранешна улога во Сајтрокс како и кој е линкот меѓу Сајтрокс и Интелекса. Дали Интелекса може да ни објасни зошто има присуство на Британските Девствени Острови? Дали Интелекса може да објасни дали Сајтрокс пренел делови од своите акции на Британските Девствени Острови?, стои во неодговореното писмо полно со прашања до Дилијан. Меѓу прашањата е дали продава на државни или на приватни ентитети, дали продава и обука а не само софтвер, дали Интелекса врши надзор ако опремата се злоупотреби и дали ќе им ги даде тие докази на грчките власти за истрагата за Предатор.

Пред неколку дена, Њујорк Тајмс ја отвори пандорината кутија за фирмата Интелекса, кога обзнани дека грчката влада и дала на оваа фирма лиценца софтверот Предатор да го извезе во Мадагаскар, држава со историја на репресивни манири и кршење на човековите права. Грчкиот неделник Документо, наведува дека и поранешниот шеф на полицијата во Грција како и судии биле меѓу инфицираните со шпиунски софтвер за да бидат следени нивните пораки, комуникации, фотографии и едноставно, се што имаат во нивните мобилни телефони.

Во Грција Предатор се користел против новинари и опозиционери, па дури и членови на Европскиот Парламент. Владата на Грција на почетокот тврдеше дека оваа опрема е илегална и дека нема никаква поврзаност со неа, за на крајот да признае дека дозволувала истата да се извезува во други држави, дел од кои режимски. Во август, премиерот Киријакос Мицотакис го отпушти шефот на службата за национална безбедност, но скандалот еруптираше и властите веќе не можеа да се кријат зад превезот на националната безбедност и да го игнорираат.

Алексис Ципрас рече дека Мицотакис е обвинет за претворање во националната безбедносна служба во парадржавна организација.

Последната капка што ја прелеа чашата се гласините дека шпиoниран преку малициозен софтвер на својот телефон бил и советникот за национална безбедност на Грција Александрос Диакополус како и шефот на националната одбрана Константинос Флорос.

Лидерот на ПАСОК Никос Андрулакис објави дека неговиот телефон бил следен. Грчкиот весник Документо откри дека министерот за труд Костис Хацидакис бил шпиуниран кога бил министер за енергетика. Европскиот Парламент со месеци ги следи случувањата околу шпиунскиот софтвер Предатор и Пегасус и нему сличните, во сите земји од Европската Унија. Таму се формираше специјален Пега одбор, за да истражува што се случува со опремата за следење на мобилни телефони ширум Европа. Во извештајот на ЕП за Грција, се вели дека Предатор е изработен и продаван од страна на Сајтрокс, фирма формирана во 2017 година во Северна Македонија како стартап.

Според извештајот, производите како Предатор што го продава Интелекса, се исклучително моќни инструменти за уништување на приватноста па затоа и фирмите кријат кој им е клиент и владите кријат кога го купуваат и користат Предаторот.

Фирмите се обидуваат да ја избегнат регулативата која налага да добијат дозвола за извоз од државата каде произведуваат за дуална употреба за производи како овој, пишува во Извештајот за Грција.

Европскиот Парламент се мачи да открие дигитално разбојништво и шпиoнажа со македонско – израелски софтвер?!