Полицијата во Загреб го приведе 42-годишниот Карло Новосел, новиот началник на општината Бистра, поради бегство од сообраќајната несреќа во која учествуваше овој петок и нарушување на јавниот ред и мир, пренесува хрватски Дневник.хр.

Тој е обвинет за неколку прекршоци и се соочува со затворска казна.

Несреќата се случила во петокот вечерта кога градоначалникот, почнал да престигнува во коловозот и удрил во возилото пред него кое невнимателно свртувало.

Како резултат на судирот, тојотата на началникот удрила во сообраќаен знак, а Мерцедесот удрил во семафор и дрво.

Двајцата возачи избегале, а тојотата на началникот Новосел останала на местото на несреќата. Ден потоа, возачот на Мерцедесот сам се пријавил во полиција, додека началникот на општина Бистра бил пронајден и приведен од страна на полициски службеници. Во несреќата, никој не бил повреден.

Како што пренесува Индекс, началникот Новосел е приведен и пријавен за дури пет сообраќајни прекршоци: напуштање на местото на сообраќајна несреќа без оставање информации за себе или пополнување на европски извештај, непочитување на сообраќаен знак – полна линија, престигнување директно пред раскрсница, престигнување на возило кое се приближувало до обележан пешачки премин и за нелегално управување со возило во сообраќајот.