Дали некогаш сте се обиделе сами да подготвите кисели краставички? Тоа е нешто што многу лесно можете да го направите дома. Киселите краставици се незаменлив дел од француските салати и сендвичи, но тие не се јадат само во зимските месеци, пишува „Дневник“.

Киселите краставички се богати со минерали, влакна, протеини и витамини Б12, Б6, А и Ц и содржат многу малку масти, поради што се идеални за подготовка дома.

На што треба да внимавате?

Но, треба да внимавате какви краставици берете или купувате за скиселување. Имено, треба да разликувате салатна краставица и краставица која ќе ја користите за скиселување. Краставиците за салата се многу подебели и поголеми од оние што се користат за скиселување, што е сорта корнишони што може да порасне и до 12 сантиметри.

Пред да започнете со самиот процес на скиселување, потребно е да извршите подготвителни дејствија, вклучително и чистење на краставиците и стерилизирање на теглата во која ќе ги ставите.

Најпрво, краставиците добро измијте ги под млаз вода. Ако на нив остане некаква трага од нечистотија, тоа подоцна ќе предизвика расипување.

Подеднакво е важно темелно да ги измиете теглите и капаците и потоа да ги стерилизирате. Наједноставниот начин да го направите ова е да ги ставите во рерна десет минути, со отворена страна надолу, на 100 до 150 степени.

Како да скиселите краставици?

Откако ќе ги направите тие две дејства, можете да преминете на подготовката на киселите краставици.

Во продолжение, прочитајте го основниот рецепт, кој можете да го менувате по потреба, па дури и да додадете зачини. Наведената количина е доволна за околу 6 тегли.

Потребни состојки:

• 2 кг краставици
• 1,5 л вода
• 3 дл алкохолен оцет
• 100 гр шеќер
• 5 супени лажици сол
• малку свеж или сушен копар

Подготовка:

Во тенџере зовријте вода, оцет, сол и шеќер. Додека се готви смесата, наредете ги исчистените краставици во стерилизирани тегли, внимавајќи да бидат густо наредени, но не премногу компресирани. Самата големина на краставиците ќе го одреди начинот и количината во секоја тегла.

Откако подготвената смеса ќе зоврие, прелијте ја врз краставиците, внимавајќи да бидат целосно покриени. На крајот додадете свеж или сушен копар.

Лесно покријте ги теглите со целофан или чинии за кафе, никогаш не ги затворајте херметички. Оставете ги да отстојат најмалку 24 часа.