Податоците од доверливата база на податоци на израелската воена разузнавачка служба покажуваат дека пет од шесте Палестинци убиени од израелските сили во војната во Газа биле цивили, односно стапката на смртност кај цивилите во Газа е околу 83 проценти, објавува денес „Гардијан“.

Податоците од класифицираната база на податоци на Израелските одбранбени сили (ИДФ) наведуваат 8.900 именувани борци на палестинското милитантно движење Хамас и палестинскиот исламски џихад како мртви или „веројатно мртви“ во мај, според заедничката истрага на „Гардијан“, израелско-палестинското списание „+972“ и хебрејскиот медиум „Локал Кол“.

Во мај, според здравствените власти во Газа, 53.000 Палестинци биле убиени во израелски напади од почетокот на војната, а тој број вклучувал борци и цивили.

Борците именувани во базата на податоци на израелската воена разузнавачка служба сочинувале само 17 проценти од вкупниот број, што укажува дека 83 проценти од мртвите биле цивили.

Според палестинското Министерство за здравство, до 14 мај оваа година во Газа имало 52.928 смртни случаи, а наведени се само луѓето чии тела се пронајдени, а не илјадниците закопани под урнатините.

Израелското воено разузнавање исто така не е запознаено со сите смртни случаи на милитанти или нови регрути, но тие бази на податоци ги користат израелските офицери за воено планирање.