Премиерот на затворена владина седница ја задолжил Агенцијата за разузнавање (АР), која е под ингеренции на претседателот, да направи внатрешна истрага и да утврди дали биле злоупотребени капацитетите на Агенцијата, откако обзнани дека извесен извор „Цилиндер“, потоа „Џокер“, го следел него и неговото семејство додека бил опозиционер, а директорката на Агенцијата не ја известила претседателката дека ќе присуствува на ваква седница на Владата.

Ова произлегува од одговорот на претседателката Гордана Сиљановска-Давкова, која во телевизиско интервју кажа дека директорката Габриела Јаковлева не ја известила дека присуствувала на оваа владина седница, на која се расправало за следење на премиер, за што предмет отвори и Јавното обвинителство, но со месеци нема информација дали има утврдено нешто во истрагата. Всушност, директорката што ја именува претседателката, не ја известила претседателката дека добила некаква наредба од Владата.

– Не сум присуствувала на таа седница. Не ме известила директорката дека ќе оди на седница на Владата. Кај мене доаѓаат, јас ги посетив. За случајот за следење на премиерот сум чула, како вие, вака, од весници – рече Сиљановска-Давкова на „Топ тема“ на Телма одговарајќи на прашањето – со кое овластување премиерот повикал на седница на Владата членови на Агенцијата за разузнавање, бидејќи „имал индиции дека бил следен“.

Мицкоски тргна кон поранешните раководства на безбедносните агенции

Владата веќе ни одговори на ова прашање и нивното образложение е дека тие се корисници на информациите од безбедносните агенции и врз основа на тоа може да се побараат дополнителни информации и појаснување, односно внатрешна истрага за определени индиции и информации.

Иако премиерот децидно посочи дека била побарана внатрешна контрола во АР, сепак потоа ретерираше дека тој не посочил од која агенција биле побарани дополнителни информации.

– Со цел да не се создаде погрешна слика, во согласност со наративот на вашето прашање, каде конкретно алудирате на една од безбедносните агенции (Агенцијата за разузнавање – н.з.), ве информираме дека станува збор за класифицирани информации и никаде не е посочено од премиерот од која од агенциите се побарани дополнителни информации за конкретните индиции како што тоа го имате наведено во вашето прашање – ни одговорија од Владата пред неколку месеци кога темата беше актуелна.

ДКСК пред одлука за заменичката на АР – дали часовите по информатика можат да бидат разузнавачки стаж?

„Слободен печат“ пишуваше дека Мицкоски барал Агенцијата за разузнавање да направи внатрешна истрага, иако според Законот за Агенцијата за разузнавање Владата нема ингеренции да бара внатрешна истрага. Според членот 20 од овој Закон, внатрешна контрола врши директорот на Агенцијата.

„Давање иницијативи за поведување постапки за утврдување на материјална и дисциплинска одговорност на вработените во Агенцијата и начинот на вршење на внатрешната контрола ги утврдува директорот“, се вели во дел од членот.

„Слободен печат“ испрати прашања до Агенцијата за разузнавање – зошто директорката не ја известила претседателката за владината седница на која се разговарало за следењето на премиерот, но одговор не добивме. Не одговорија ниту од Јавното обвинителство до каде е предметот што се отвори веднаш откако премиерот кажа дека го следеле на крајот на минатата година.

Тогаш од Обвинителството соопштија дека републичкиот обвинител, според своите законски овластувања, веќе има оформен предмет по допрен глас врз основа на изјава на претседателот на Владата, кој на седница за пратенички прашања во Собранието на РСМ изјави дека бил незаконито следен од безбедносни служби во текот на 2020 година, информираа од Обвинителството.

ДКСК го затвори за јавност предметот за заменичката на АР – претседателката во одбрана на директорките

– Предметот веќе е даден на постапување на надлежно обвинителство за да ги испита наводите. Имајќи предвид дека се работи за сензитивен карактер на пласираната информација, Обвинителството ќе ги преземе сите неопходни активности преку надлежни органи за да ги испита својствата на можни инволвирани лица и евентуалните инкриминирани дејства – велат од Обвинителството.

Антикорупциската комисија, слично како и за директорот на Агенцијата за национална безбедност, Бојан Христовски (само сега на затворена седница) ја запре постапката против заменик-директорката на Агенцијата за разузнавање Ивана Стојановска, која беше отворена уште во јули минатата година, со образложение дека и Јавното обвинителство отворило предмет против Стојановска со исти наводи дека доставила лажна биографија и фалсификувани документи.

Освен за Стојановска, ДКСК имаше добиено претставка и за директорката на Агенцијата за разузнавање Јаковлева, во која било наведено дека не доставувала извештаи за работата на Агенцијата ни до Собранието, ни до претседателот на Владата.

Мицкоски од собраниска говорница обзнани дека извесен извор „Цилиндер“, кој потоа бил преименуван во „Џокер“, физички го следел како основач и финансиер на параполициска воена вооружена формација. Ова, според премиерот, служело како покритие за да биде физички следен тој, неговата сопругата, неговиот син и членови на партијата во 2020 и 2021 година.