Почетокот на првиот уписен рок на универзитетот „Св. Климент Охридски“ во Битола започна и минува без проблеми. На факултетите кои се дел од униврзитот Св. Климент Охридски се пријавуваат кандидати и заинтересирани, а ќе ја имаат можноста да ги достават документите до 27-ми овој месец, објави „Тера“.

Денеска е првиот ден од пријавувањето по конкурсот за упис на студенти во академската 2025 / 2026 година. Според конкурсот, Првиот уписен рок на УКЛО ќе се реализира од 19 до 27 август 2025 година. На располагање има места за сите заинтересирани: 1.199 студенти во државна квота, 675 со кофинансирање и 444 за вонредни студии. Минатата година Универзитетот забележа пораст од околу 12% на бројот на бруцоши, запишани беа 1.094 студенти Оваа година, бројот на места во државната квота е оптимален, за 1.199 нови студенти и УКЛО упатува апел до заинтересираните кандидати да го искористат првиот уписен рок и да се запишат во државна квота.

„Покрај широка палета студиски програми со современи услови и поддршка за студентите, УКЛО овозможува пристап до европската COLOURS мрежа од 9 универзитети со повеќе од 120.000 студенти, УКЛО нуди европско образование, можности за студентски мобилности, избор на предмети од партнери во Европа и наставен кадар посветен на вашите цели, со практичен пристап кон знаењето и развојот на вашите компетенции. Драги наши идни бруцоши, вие сте новата енергија на Универзитетот – генерација која ќе учи, ќе истражува, ќе се поврзува со Европа и ќе го гради сопствениот пат кон успехот. Со посветеност и труд, раководството, професорите и сите вработени на УКЛО подготвени сме да ви помогнеме максимално да користите сè што Универзитетот „Св. Климент Охридски“ – Битола и COLOURS ви нудат за вашиот интелектуален и професионален развој“, велат од битолскиот државен универзитет.