Ранчерот и филантроп Роберт „Боб“ Норис, најпознат по улогата во рекламите на цигарите „Марлборо“ почина на 90-годишна возраст, пренесува Си-Ен-Ен.

Тој почина во Колорадо Спрингс, во сојузната американска држава Колорадо пред една недела, стои во изјавата која ја објави компанијата „Tee Cross Ranches“ чиј основач е токму Боб Норис.

– Кога некој маж би можел да се опише со три зборови, за Боб тоа би биле „the real deal“. Неговата цврста автентичност, без обзир на тоа дали беше на коњ, седеше во канцеларијата, го учеше детето или минуваше моменти со неговите пријатели, тоа беше неговиот личен и професионален бренд – стои во соопштението.

Се додава дека токму тие особини, заедно со неговиот маркантен изглед, биле пресудни да ја добие неочекуваната улога на првиот „Марлборо маж“ на телевизија. Норис, кој според соопшението никогаш не бил пушач, се појавувал во рекламите 14 години. Тој ја напуштил кампањата кога почувствувал дека давала лош пример за неговите деца.

– Никогаш не сакам да ве видам да пушите – им велел на своите деца, се додека не го прашале: „Ако сакаш да не пушиме, зошто тогаш ги снимаш рекламите?“. Тогаш Норис престанал да ги рекламира Марлборо.

Кога барале Марлборо модел, проблемот бил во тоа што никој од пријавените не знаел да јава коњ, а луѓето од компанијата сакале човекот да биде каубоец. Норис имал ранч и коњи, па им одговарал совршено за оваа улога.