Почесна артилериска стрелба вечерва по повод Денот на независноста
По повод 8-ми септември – Денот на независноста вечерва ќе се изврши почесна артилериска стрелба.
Препорачано
Од Армијата информираат дека во 18:30 од касарната „Илинден” во Скопје ќе се изврши почесна артилериска стрелба со истрелување на пет плотуни од артилериски орудија од страна на артилерискиот баталјон на Армијата на Република Северна Македонија.
Владата утре од 10 часот на отворено ќе ја организира централната прослава по повод 29 години од прогласувањето на независноста и самостојноста на државата, на која ќе се обрати премиерот Зоран Заев.
Пред централната прослава по повод 8 Септември – Ден на независноста, владина делегација во 8 часот ќе положи свежо цвеќе на вечните почивалишта на поранешните претседатели на државата, Борис Трајковски и Киро Глигоров, на гробиштата „Бутел”.
Делегацијата ќе ја предводи премиерот Заев и во неа ќе бидат првиот вицепремиер и министер за политички систем и односи меѓу заедниците Артан Груби, вицепремиерот задолжен за борба со корупција и криминал Љупчо Николовски и министерките за образование и наука и за труд и социјална политика, Мила Царовска и Јагода Шахпаска.
