Српскиот министер за образование Бранко Ружиќ денеска поднесе неотповиклива оставка до премиерката Ана Брнабиќ, по масакрот во основното училиште „Владислав Рибникар”, каде беа убиени осуммина ученици и чувар, објавија српските медиуми, повикувајќи се на изјава од Министерството за образование.

Во писмото што го испратил до премиерката, се наведува дека оставката ја понудил моментално истиот ден кога се случи трагедијата.

„Оставката е личен, но и политички чин, во развиените демократски општества е одраз на сила, а во нашиот регион често одраз на слабост. Јавноста нека суди”, пишува во писмото.

Ружиќ порачува дека Србија мора да остане обединета во болката, тагата и борбата за „доброто да го победи злото, а правдата неправдата”.

Ружиќ уште еднаш „со неискажлива болка им изразува најдлабоко сочувство до најблиските на жртвите“ и додава ангелчињата да почиваат во мир и Господ нека ни е на помош вакво нешто никогаш да не се случува повторно.

„Драматичните слики од настаните од училиштето, солзите пролеани при изразување на сочувство до неутешните родители на настраданите деца, ќе ги носам како печат на мојата душа до крајот на животот”, вели Ружиќ во писмото до премиерката.

Тој утринава положи венец и се потпиша во книгата на жалост во ОУ „Владислав Рибникар“ во Белград.

?? @socijalisti pic.twitter.com/LiWKLTnj83

— Branko Ružić (@brankoruzicsps) May 7, 2023