На денешната собраниска седница беше донесен заклучок по скратена постапка да се изгласа Предлог-законот за изменување и дополнување на Законот за субвенциониран студентски оброк. Предлогот, како што образложи пратеничката Моника Зајкова, предвидува зголемување на дневниот износ на оваа субвенција и можност освен од понеделник до сабота, таа да важи и на верски празници што значи, дека месечниот износ ќе биде поголем од сега.

Предлогот е поднесен од пратениците од владејачкото мнозинство Моника Зајкова, Санела Шкријел, Боби Мојсовски, Даниела Николовска и Жаклина Лазаревска.

-Законот предвидува системско решение и, конечно, ќе добиеме систем за да не се соочуваме секоја година да имаме по два предлога и да собираме политички поени за оваа мерка, рече Зајкова.

По усвоениот заклучок овој Предлог да се носи по скратена постапка, матичната Комисија за образование, наука и спорт треба да го стави на дневен ред на разгледување.

Предлог за измени на истиот Закон на оваа седница претходно имаше и од пратеници од ВМРО-ДПМНЕ, кој не беше усвоен. Пратениците Јован Јаулевски, Бојан Стојаноски и Ели Панова поднесоа Предлог-закон за изменување на Законот за субвенциониран студентски оброк, по скратена постапка.

Пратеникот Јаулевски образложи дека предлагаат дневниот износ на субвенцијата студентски оброк од 120 денари, колку што е сега, да биде зголемен на 160 денари, а исплатата да трае до септември кога ќе почне примена на системско решение кое се подготвува. Тој истакна дека износот на оваа субвенција треба да го следи зголемувањето на трошоците за живот и на минималната плата во земјава.