Европа мора да „порасне“ и да ја засили својата поддршка за Украина по коментарите на американскиот претседател Доналд Трамп, кој го поддржа Киев во неговите напори да ја врати целата територија окупирана од Русија, изјави германскиот министер за надворешни работи Јохан Вадефул.

Во разговор за германската радио станица Дојчландфунк, Вадефул рече дека Трамп сфатил дека неговите сопствени напори не успеале да го убедат рускиот претседател Владимир Путин да ја заврши војната во Украина, објави денес Ројтерс.

Изјавите на Трамп на платформата Truth Social означија остра и голема реторичка промена за американскиот лидер, кој претходно ја повика Украина да се откаже од територијата за да ја заврши војната со Русија.

„И затоа мора да погледнеме што можеме да постигнеме сами. Можеме да постигнеме многу повеќе, сите европски земји не го исполнија она што ѝ го ветија на Украина. Мора да погледнеме какви други финансиски и воени опции имаме“, рече Вадефул.

Германскиот министер оцени дека коментарите на Трамп се добри за Украина и добри за Европа.

Вадефул додаде дека Трамп „навистина мора да признае“ дека неговите напори со рускиот претседател Владимир Путин „досега не биле успешни“.
Тој предупреди дека засилувањето на безбедносните напори на Европа нема да биде лесно.

Во објава на социјалните мрежи вчера, Трамп, осврнувајќи се на војната меѓу Русија и Украина, рече дека „со време, трпение и финансиска поддршка од Европа, а особено од НАТО, оригиналните граници со кои започна оваа војна ќе бидат многу веројатна опција“.