Родителите од две одделенија од кумановското основно училиште „Крсте Мисирков” кои неколку дена протестираа и не ги пуштаа децата на настава поради смена на учителки, денеска најавија дека учениците ќе тргнат на училиште.

– Ние како родители направивме сè, се обративме до сите институции сите ни дадоа ист одговор дека се е според законот а никој не сакаше да одговори за последиците коишто ги имаат нашите деца. Останавме сами не добивме поддршка ниту од граѓаните, ниту од институциите, но апелираме во иднина да не се дозволува вакво нешто, да се води грижа за здравјето на децата за нивните приоритети, да бидат среќни. Ги исцрпевме сите можности, немаме повеќе каде да се обратиме. Во интерес на децата, одлучивме учениците од понеделник да си одат на училиште редовно како што треба. Како родители свесни сме што направивме, ќе почитуваме се и да нè повикаат и на разговор и на советување. Ние не ги оставивме децата за да немаат образование, туку да нема толку често смени на учителки, изјави претставник на родителите, Верица Тодоровска.

Родителите остварија средби со сите надлежни институции од Куманово, со директорот на училиштето, раководителот на секторот за образование. Надлежните во неколку наврати потврдија дека на конкурсот е избран кадар со повисок степен на образование согласно барањата, што е потврдено и од Државниот просветен инспекторат, кој извршил увид во постапката.

Извор:МИА