Поранешниот претседател на Боливија, Ево Моралес, се врати во земјата по едногодишниот егзил во Аргентина и веднаш тргна на тридневно патување од 1.000 километри до неговото упориште во централниот дел на земјата.

– Дел од мојот живот остана во Аргентина, по 11 месеци прогонство, рече поранешниот претседател, кој пешки го мина делот од границата меѓу градот Ла Квика, на северот од Аргентина до Вилазон во јужниот дел на Боливија, јави агенцијата Хина.

Моралес во Аргентина беше придружуван од левоцентристичкиот претседател Алберто Фернандез, кој во неделата присуствуваше на церемонијата на давање заклетва на новиот претседател на социјалистичка Боливија, Луис Арсе.

Моралес се заблагодари на аргентинскиот претседател за гостопримството, додавајќи дека „му го спаси животот”, а по преминување на границата беше дочекан од стотици приврзаници. Тој се врати во Боливија, откако неговата социјалистичка партија МАС се врати на власт, една година по поднесената оставка и насилните протести на опозицијата.

Поранешниот боливиски претседател (2006-2019) најпрво мина неколку недели во Мексико, а потоа се засолни во Аргентина.

Моралес, кој владееше со земјата 14 години, ја напушти Боливија во ноември лани по неуспешниот обид за добивање на четврти претседателски мандат на изборите што беа обележани со обвинувања за измама.

Неговото враќање ги зголеми тензиите во и онака напнатата политичка сцена во земјата, каде новиот Конгрес со социјалистичко мнозинство ја наметнува својата политичка агенда во услови на жестоки протести на опозицијата.

Засега е нејасно каква улога ќе има Моралес во политичкиот живот на Боливија.