Светската банка (СБ) ќе поддржи проекти за производство на нуклеарна енергија „за прв пат по децении“, изјави претседателот на институцијата, Аџај Банга, во писмо до кое агенцијата Франс-прес добила пристап.

Ова ќе вклучува поддршка на „напорите за проширување на постојните реактори во земјите што веќе ги имаат, како и подобрување на мрежите и инфраструктурата. Исто така, ќе работиме на забрзување на потенцијалот на малите модуларни реактори, кои ќе понудат одржлива опција за повеќе земји на долг рок“, пишува претседателот на СБ. За да се постигне ова, СБ ќе соработува со Меѓународната агенција за атомска енергија (МААЕ) за зајакнување на советодавните капацитети за заштитни мерки против ширење, безбедносни и регулаторни рамки, истакна Банга. Тој не ги прецизираше износите што би можеле да бидат доделени за овие проекти, пренесува БТА.