Четири години не работи подната фонтана на плоштадот Македонија откако во неа неколкупати пропаднаа камиончиња за транспорт и за одржување хигиена, при што претрпе сериозни оштетувања, кои во изминатите години, поради најразлични оправдувања, надлежните не ги санираа.

Па, така, негрижата, немањето желба или средства, не дозволија да се врати во „живот“ фонтаната којашто беше изградена во рамките на проектот „Скопје 2014“ и која според многумина граѓани беше најатрактивниот и најубав дел од овој проект.

За изградба на фонтаната беа потрошени 2,5 милиони евра, беше пуштена во употреба во 2015 година и стана атракција за децата, кои секое лето трчаа и се натпреваруваа со водените водоскоци, осветлени во најразлични бои. Сега таа стои сува, оградена со бетонски топки и саксии со зеленило за да се спречи повторно некое возило да пропадне внатре и да предизвика дополнителни оштетувања.

Не знам како никој не се ангажира да ја поправи. Прво, излегува дека џабе се фрлиле пари од буџетот, а покрај тоа и навистина беше преку лето убаво да се биде тука. Видете сега на што личи ова! – коментира скопјанец со кого поразговаравме на плоштад.

Одржувањето на 12-те фонтани во централното градско подрачје е обврска на ЈП „Водовод и канализација“. Освен за подната фонтана претпријатието е задолжено да се грижи и за фонтаните „Воин на коњ“, како и за оние кај црквата „Света Богородица“, „Свети Ѓорѓија“, на плоштадот „Филип Втори“ и други.

Токму од ова претпријатие стигнуваат оптимистички најави.

Подната фонтана ќе биде поправена во најскоро можно време, на задоволство на сите скопјани – кусо одговараат од „Водовод и канализација“, без притоа да прецизираат кога, дали веќе е започната санацијата и за какво точно оштетување станува збор што мораше да почека неколку години.

Навистина, во последните две недели можеа да се забележат некои активности на плоштадот околу фонтаната, се менуваа некакви филтри или мотори, а и подолго време  стои и мала дупка на фонтаната. За жал, од „Водовод и канализација“ не сакаа да споделат со јавноста за какви интервенции станува збор.

Од претпријатието пред две години, одговарајќи на прашања од „Слободен печат“, посочија дека фонтаната не е во добра кондиција, дека грижата за нејзиното одржување не била континуирана во изминатите години, а дополнителен проблем предизвикале и неколкуте пропаѓања на возила во фонтаната. Тогаш посочија дека е направена процена на оштетувањата и процена за тоа колку би чинела санацијата и ветија дека фонтаната ќе биде обновена штом заврши пандемијата со корона. Пандемијата помина, но фонтаната остана непоправена.

Обврската за одржувањето на овие фонтани уште пред неколку години, Град Скопје, во мандатот на градоначалникот Петре Шилегов, му ја префрли на јавното претпријатие.

Сопственик на фонтаните е Градот Скопје, а според Одлука на Советот на Градот, за нивното одржување дадена е обврска на ЈП „Водовод и канализација“. Таквата стекната надлежност покрај главниот фокус на претпријатието, обезбедување квалитетна вода за пиење на скопјани, ја реализираме на тековно ниво. Годишниот трошок за редовно одржување, со вклучени поправки изнесува помалку од 18 милиони денари – соопштија тогаш од претпријатието.

Освен оваа фонтана, надвор од функција се и фонтаните во Вардар кај Камениот мост. Тие исто така не работат, но од ЈП „Водовод и канализација“ не одговараат дали се расипани или едноставно не се пуштени да прскаат годинава.

Која и да е причината, изгледаат навистина грдо, како заборавени цевки на островчиња од земја со куп ѓубре и гранки насобрани околу нив. За туристите во градот ова сигурно претставува „незаборавна“ глетка.

Подната фонтана на плоштад ќе „пропрска“ кога ќе заврши пандемијата